Шофиркон туманидаги “Шибирғон”, “Султонобод”, “Дўрмон” ҳамда Ғиждувон туманидаги “Гулистон”, “Кўлижаббор” маҳаллаларини кесиб ўтувчи Абдуллахон зовуридан қарийб бир йилдан бери қизил рангли сув оқаётгани одамларни ташвишга солган. Яқин атрофда қассоб бўлиб, у бир кунда бир нечта қорамолларни сўйиб, қонини шу зовурга оқизиб юборар экан, деган гап-сўзлар ҳам тарқалган.
Аниқланишича, ҳудуддан 1,5 километрча узоқ масофада жойлашган Ғиждувон туманидаги “Парвоз Ҳумо равнақ” ип-йигирув фабрикасида кимёвий моддалар билан ювиладиган рангли матолардан чиққан сув канализация орқали зовурга йўналтирилган. Иншоотда йиғилган сувлар етарлича тозаланмай, тўғридан-тўғри зовурга оқизиб келинган. Аҳолининг билдиришича, маҳалладаги пахтазор, буғдойзор ва одамларнинг томорқа ерлари, қорамоллари иложсизликдан қизил рангли сув билан суғорилган. Вилоят ҳокими аввалроқ мутасаддилар билан ҳолат жойига чиқиб, вазиятни кўрган. Бироқ, масъуллар вилоят ҳокимига ёлғон маълумот бериб, бошқа манзарани кўрсатган.
Шундан сўнг Ботир Зарипов ташаббуси билан Ғиждувон ҳамда Шофиркон туманлари кесишмасидаги Абдуллахон зовурини тозалаш, сизот сувлар чўкиндисидан ҳосил бўлган лой ва балчиқларни олиб кетиш ишлари бажарилган.
