Аёл – Аллоҳнинг бебаҳо туҳфаси, умр баҳорининг гули, ҳар қанча таъриф-у ташбеҳлар ожиз бўлган мўжизадир. Баҳорнинг беназир кунларида байрамлар байрамларга уланиб, ҳаётимиз ёритгувчи чироқлари хотин-қизларимизнинг гўзал айёми – 8 март арафасида турибмиз.
Бугун Бухоро давлат университети фаоллар йиғингоҳида ректор Обиджон Хамидов бошчилигида, университет ходимлари ва профессор-ўқитувчилари, Касаба уюшмаси ҳамда Маънавият ва маърифат бўлими ҳамкорлигида нафосат ва назокат айёми муносабати билан жамоада хизмат қилаётган барча мўтабар ва азиз хотин-қизларимиз учун аталган “Аёл борки, олам мунаввар” деб номланган бадиий байрам тадбири бўлиб ўтди. Юксак савияда ташкил этилган байрамда Бухоро давлат университетининг аёл профессор-ўқитувчилари, раҳбар аёллар, ишчи-ходималар иштирок этишди.
Тадбирни БухДУ ректори самимий йўллаган дил сўзлари билан очиб берди.
“Аёлларни, қизларни баҳорга қиёслашади. Аёлни эъзозлаш – бизнинг миллатимиз, халқимиз учун олий қадрият даражасига кўтарилган фазилат. Аёлларни қанча улуғласак, ҳаётимизнинг чироғи, умримизнинг баҳори, гули деб эъзозласак, демакки, оиламизни, ватанимизни эъзозлаган бўламиз.
Умр йўлида қандай оғир синов ва машаққатларга учрамайлик, уларни енгиб ўтишда руҳимизни кўтариб, ғайратимизга – ғайрат қўшадиган инсонлар ҳам дунёдаги энг мўътабар зотлар, оналаримиз, опа-сингилларимиз, жонажон қизларимиз- бебаҳо аёлларимиздир. Умримизнинг ҳар бир кунида ҳиссангиз бор. Байрамингиз қутлуғ бўлсин, азиз аёллар!” – деди университет ректори Обиджон Хамидов.
Халқаро хотин-қизлар кунига бағишланган тадбир кўтаринки руҳда ўтди. Тадбир давомида аёлларга эътибор намунаси сифатида гуллар ва табрикномалар тақдим этилди. Санъатшунослик факультети магистрантлари, ўқитувчилари томонидан ижро этилган дилбар тароналар, куй-қўшиқлар, факултет қошида ташкил этилган “Феруза” рақс ансамблининг жажжи болажонлари томонидан тайёрланган рақслар байрам тадбирига файз бағишлади.
Рустам Раҳимбоев,
БухДУ Жисмоний маданият факультети талабаси
