Бухоро давлат университетида Ҳазрат АлишерНавоийга ўрнатилган бюст қаршисида БухДУ раҳбарияти, Бухоро Ёзувчилар уюшмаси раиси, Ўзбекистон Республикаси Маънавият-маърифат маркази Бухоро вилояти бўлими раҳбари, Вилоят ҳокимининг маслаҳатчиси, жамоатчилик вакиллари, Ўзбекистон Республикаси фавқулодда вазиятлар вазирлиги Бухоро вилояти бошқармаси ходимлари, профессор-ўқитувчилар, талаба-ёшлар тўпланиб, ҳазрат Навоийга эҳтиром юзасидан бюст пойига гулчамбар қўйилиб, ҳурмат бажо келтирилди.
Бухоро давлат университети бош фоесида ғазал мулкининг султони Мир Алишер Навоий таваллудига бағишлаб университет жамоаси томонидан кўргазма ташкил этилди.
Шунингдек, Бухоро давлат университети катта мажлислар йиғингоҳида туркий тил тамал тошини қўйиб, уни мустаҳкамлаган, сўз мулкининг султони Мир Алишер Навоий таваллудининг 584 йиллигига бағишланган “Алишер Навоий-буюк давлат арбоби ва маънавиятимиз гултожи” номли тантанали байрам тадбири бўлиб ўтди. Тадбир давлат мадҳияси ижроси билан бошланди.
Ушбу тадбир аввалида БухДУ Ёшлар масалалари ва маънавий-маърифий ишлар бўйича биринчи проректори Д.Ш.Явмутов, Бухоро вилояти ҳоким ёрдамчиси Акбар Рустамов, Ўзбекистон Республикаси Ёзувчилар уюшмаси Бухоро вилоят бўлими раҳбари Шодмон Сулаймонов, Ўзбекистон Республикаси Маънавият-маърифат маркази Бухоро вилояти бўлими раҳбари Марҳабо Давлатовна, БухДУ профессори, навоийшунос Н.Бековалар сўзга чиқиб, миллатимиз қуёши Алишер Навоий таваллуди билан йиғилганларни муборакбод этишди.
Тадбир давомида бутун умрини туркий тилнинг нуфузини кўтариш, туркий давлатчилик асосларини мустаҳкамлашга бағишлаган Алишер Навоий ҳаётидан ибратли саҳна кўринишлари ижро этилди. Мир Алишер Навоийнинг сермаҳсул ижодидан намуналар келтирилди. Айниқса, куйга солинган ғазаллар йиғилганларнинг гулдурос олқишларига сабаб бўлди.
БухДУ Ахборот хизмати
