Тиббиёт ходимлари куни муносабати билан Ромитан тумани марказида жойлашган “Шердор” тантаналар саройида тантанали туман байрам тадбири бўлиб ўтди.
Байрам тадбирида сектор раҳбарлари, туман ҳокими ўринбосарлари, тегишли ташкилот, корхона раҳбарлари, туман тиббиёт бирлашмаси вакиллари, Санитария-эпидемиологик осойишталик ва жамоат саломатлиги маркази ва хусусий тиббиёт муассасалари шифокорлари, туманимизнинг барча ҳудудларидан тиббиёт ходимлари, ҳамширалар ҳамда фахрийлар иштирок этишди.
Инсон саломатлигини асрашдек эзгу ва савобли ишга ўзини бағишлаган туманимиз тиббиёт ходимларини байрам билан қутлаш учун сўз олган туман ҳокими Умеджон Барноев тиббиёт соҳаси ва шифокорларнинг ҳаётимиздаги ўрни ва аҳамияти нақадар муҳим эканлигига алоҳида эътибор қаратди. Туманимизда сўнгги йилларда бу соҳанинг жадал ривожланиб бораётгани, эришилаётган натижалар ва янги марралар ҳақида тўхталди.
Тадбирда туман ижтимоий ҳаётида фаоллик ва ташаббускорлик кўрсатган, ўзининг самарали меҳнати билан туманимизда аҳоли саломатлигини муҳофаза қилишга, соғлом турмуш тарзи тамойилларини кенг жорий этишга ва тиббий маданиятни оширишга салмоқли ҳисса қўшиб келаётган тиббиёт соҳаси ходимларининг катта гуруҳи туман ҳокимининг Фахрий ёрлиғи, ташаккурномаси ва совғалари билан тақдирландилар.
Байрам тадбири бир пиёла чой устида таниқли санъаткорлар, рақс ансамбллари чиқишлари, туман Маданият бўлими томонидан байрамона концерт дастурининг намойиш этилиши, тиббиёт ходимларига кўтаринки кайфият улашди.
Дарҳақиқат, шифокор деганда, ҳамиша ҳар биримизнинг кўз ўнгимизда қалб меҳри ва касб масъулияти билан дардларга дармон бўлаётган, соғлом авлод дунёга келишига ҳиссасини қўшиб, фидойилик намуналарини кўрсатаётган жонкуяр инсонлар намоён бўлади.
