Ота алимент тўловини олдиндан тўлади

Оила муқаддас даргоҳ, оилада тинчлик-хотиржамлик, тотувлик бўлса, жамият ҳам ривожланади. Афсуски, оилавий келишмовчиликлар оқибатида айрим оилалар парокандаликка юз тутмоқда.
Бироқ, фарзанди таъминоти учун суд томондан белгиланган алимент тўловини ўз вақтида амалга оширётган масъулиятли оталар кўпчиликни ташкил этади.
Алимент тўловлари авваламбор вояга етмаганларнинг ҳуқуқлари ва манфаатларини ҳимоя қилишга қаратилган.
Жумладан, Бюронинг Бухоро туман бўлими иш юритувида фуқаролик ишлари бўйича Бухоро туманлараро судининг 11.03.2016 йилдаги ижро ҳужжатига асосан қарздор Ш.Худойбердиевдан ундирувчи Г.Норова фойдасига 2 нафар вояга етмаган фарзанди моддий таъминоти учун ойлик даромадининг 1/3 қисми миқдорида алимент ундириш тўғрисидаги ижро ҳужжати мавжуд.
Ижро ҳаракатлари давомида қарздор 5 йиллик давр учун алимент тўловини олдиндан тўламоқчилигини маълум қилган.
Бўлим давлат ижрочиси М.Мирзоев томонидан ижро ҳужжатида тарафларнинг қонунчиликда белгиланган ҳуқуқ ва мажбуриятлари ҳамда Вазирлар Маҳкамасининг 06.10.2018 йилдаги 808-сонли қарорига билан тасдиқланган “Алиментларни олдиндан тўлаш, шунингдек алимент тўлаш мажбуриятини таъминлаш бўйича гаров шартномаси тузиш тартиби тўғрисида”ги Низом талаблари тушунтирилган.
Шундан сўнг, ота 5 йиллик давр учун олдиндан алимент тўлаш учун ижро ҳужжати бўйича ижро этиш усули ва тартибини ўзгартиришни сўраб, фуқаролик ишлари бўйича Бухоро туманлараро судига мурожаат қилган.
Давлат ижрочиси томонидан 2023 йил апрель ойидан 2028 йил январь ойига қадар бўлган давр учун амалдаги ўртача ойлик иш ҳақи ҳисобидан 72.138.171 сўм миқдорида алимент тўловлари ҳисобланган.
Қарздорнинг аризаси суд томонидан қаноатлантирилиб, суд ажримига асосан ижро иши юзасидан ижро этиш усули ва тартиби ўзгартирилган ҳамда 5 йиллик давр учун олдиндан тўланиши лозим бўлган 72.138.171 сўм миқдоридаги алимент пуллари қарздор томонидан 5 кун муддат ичида тўланиши белгиланган.
Ижро ҳаракатлари давомида қарздор томонидан тўланиши лозим бўлган 72.138.171 сўм миқдорида алимент пуллари бир йўла ундирилиб, ундирувчи номига АТ “Алоқабанк” Бухоро филиали томонидан очилган банк пластик картага кўчириб берилди ва ижро ҳужжати амалда тамомланди.
           Мазкур тадбирлар давом эттирилмоқда.
Бюронинг Бухоро вилоят бошқармаси