Вобкент туман ҳокими Ф.Умаровнинг 9-май – Хотира ва қадрлаш куни байрами муносабати билан туман халқига байрам табриги

Ассалому алайкум, Муҳтарам фахрийлар! Ҳурматли меҳмонлар!
        
Бугун Ватанимизда 9-май – Хотира ва қадрлаш куни, Иккинчи жаҳон урушида қозонилган ғалабанинг 78 йиллиги кенг нишонланмоқда.
Ана шу қутлуғ айём билан сизларни, сизлар орқали кўп миллатли бутун халқимизни чин қалбимдан муборакбод этаман. Барчангизга ўзимнинг чуқур ҳурмат-эҳтиромим ва эзгу тилакларимни билдираман.
   Бугун барчамиз аввало буюк Ғалабага беқиёс ҳисса қўшган, мана шу ёруғ кунларга етиб келолмаган азиз инсонларни ёд этамиз, уларнинг хотираси, пок руҳлари олдида таъзим қиламиз. Шафқатсиз урушда, машаққатли меҳнат фронтида мардлик ва жасорат кўрсатган барча фахрийларимизга юксак ҳурмат ва эҳтиром, чуқур миннатдорлик билдирамиз.
Азиз нуроний отахонлар ва онахонлар!
Инсоният тарихидаги энг даҳшатли бу урушда икки миллионга яқин Ўзбекистон фуқароси қатнашган. Уларнинг ярим миллиондан зиёди ҳалок бўлган, 133 минг нафарга яқини бедарак йўқолган, 60 мингдан ортиқ ватандошимиз эса урушдан ногирон бўлиб қайтган.
Уларнинг сафида  Вобкентнинг мард ўғлонлари елкама-елка туриб қонли жангларда фашизм устидан қозонилган ғалабага ўз ҳиссаларини қушишган.
Мамлакатимизда 9 май умумхалқ байрами – Хотира ва қадрлаш кунини кенг нишонлаш асносида иккинчи жаҳон урушида фашизмга қарши жангларда қатнашиб жасорат кўрсатганлар ва шу ўринда кўплаб уруш орти меҳнат фахрийлари, шунингдек, мустақиллик йилларида хизмат бурчини бажариш чоғида ҳалок бўлган ҳарбий хизматчилар ва ҳуқуқни муҳофаза қилиш органлари ходимларининг хотирасини абадийлаштириш чоралари кўрилди.
Туманимиздаги Хотира майдонида иккинчи жаҳон уруши даврида бедарак йўқолган ва жанг майдонида ҳалок бўлган юртдошларимизнинг номи хотира китобига киритилиб абадийлаштирилди.
Қадрли ва муҳтарам тумандошлар!
Сиз, азизларни қутлуғ байрам – Хотира ва қадрлаш куни билан яна бир бор чин қалбимдан табриклайман. 
Ҳаммангизга сиҳат-саломатлик, хонадонларингизга файз-у барака тилайман.
Дунёдаги энг катта бахт – фарзандлар, набираларнинг бахт-у камолини кўриш барчангизга насиб этсин.
Юртимиз тинч, халқимиз  омон, осмонимиз доимо мусаффо бўлсин!