Ҳар йили инглиз, немис, француз тиллари (хорижий тиллар) ўқитиладиган мактаблар ўртасида хорижий тилларни ўқитиш бўйича энг яхши мактаб танлови ўтказилади.
Республика босқичида биринчи ўринни эгаллаган мактабга 500 млн сўм мукофот берилади. Ўзбекистон Республикаси Президентининг 2021 йил 19 майдаги “Ўзбекистон Республикасида хорижий тилларни ўрганишни оммалаштириш фаолиятини сифат жиҳатидан янги босқичга олиб чиқиш чора-тадбирлари тўғрисида”ги ПҚ-5117-сон қарори қабул қилинди.
Мазкур қарорга мувофиқ хорижий тилларни ўқитишга ихтисослаштирилган мактаблар ташкил этилди, шунингдек Ўзбекистон Республикаси Вазирлар Маҳкамасининг 2021 йил 9-сентябрдаги “Умумий ўрта таълим ташкилотлари, академик лицей ва касб-ҳунар мактаблари ўқувчилари ўртасида фан олимпиадаларини ташкил этиш, ўтказиш ҳамда халқаро олимпиадалар иштирокчиларини саралаш ва ғолибларни рағбатлантириш тартиби тўғрисида”ги 562-сонли Қарори билан жорий этилган Ўзбекистон Республикаси Президентининг соврини учун “Хорижий тилларни ўқитиш бўйича энг яхши мактаб” танловининг туман босқичи бугун Вобкент туман Халқ таълими бўлимига қарашли 2-умумтаълим ўрта мактабида бўлиб ўтди.
Танловда ҳар бир мактабнинг 7−9-синфларда ўқийдиган 5 нафар ўқувчидан ташкил топган гуруҳлар иштирок этди.
Шундан сўнг тадбирни очиш учун сўз Вобкент туман ҳокими Ф.Умаровга берилди. Туман ҳокими аввало устозлар ва ўқувчиларни яқинлашиб келаётган Ҳайит байрами билан табриклаб, танловда иштирок этиб, ғолиб бўлган умумтаълим мактаби жамоасига муҳтарам Президентимиз томонидан туман босқичида:
1-ўрин учун — 100 миллион сўм,
2-ўрин учун — 75 миллион сўм,
3-ўрин учун — 50 миллион сўм пул мукофотлари маҳаллий бюджет маблағлари ҳисобидан тақдирланиши белгиланганлигини тушунтириб ўтди.
Танловда барча иштирокчиларга мувафаққиятлар тилаб туман босқичида ғолиб бўлган мактаб жамоаларига вилоят ва республика босқичларида пухта тайёргарлик кўриб юқори натижаларга эришишлари тилади.
Шундан сўнг ўқувчилар синф хоналарига киришди. Тестлар солинган қути очилиб, унинг ҳаққонийлиги ўқувчиларга кўрсатилди ва танловда жараёнига рухсат берилди.
