Ромитан тумани ҳокимлиги, “Маҳалла” хайрия жамоат фонди, Маҳалла ва нуронийларни қўллаб-қувватлаш бўлими ҳамкорлигида ҳар куни навбати билан маҳаллаларда ифторлик тадбирлари ташкил этилмоқда, бу ифторликларда маҳаллалар оқсоқоллари, фаоллари, эҳтиёжмандлар иштирок этишмоқда, ташкилотчиларга миннатдорчилик билдириб, юртимиз равнақи учун дуолар қилишмоқда.
1-секторга қарашли “Самосий” маҳалла фуқаролар йиғинида жойлашган муқаддас қадамжолардан бири “Муҳаммад Бобойи Самосий” зиёратгоҳида Ромитан тумани қишлоқ хўжалиги бўлими томонидан тумандаги барча маҳалла фуқаролар йиғинларидан 500 нафарга яқин вакиллари ифторлик дастурхонига таклиф қилинди. Унда туман ҳокими Умеджон Барноев, туман Халқ қабулхонаси мудири, туман ҳокими ўринбосарлари, тегишли ташкилот, корхона, муассасалар раҳбарлари, МФЙ ҳодимлари ҳамда маҳалла фаоллари ҳам иштирок этди.
Ифторлик аввалида улуғ ойда ён-атрофдагиларга меҳр-саховат кўрсатиш, яқинлар ҳолидан хабар олиш катта савоб экани таъкидланди. Ифторликда иштирок этган рўзадор нуронийлар юртга тинчлик-осойишталик, қут-барака, амалга оширилаётган бунёдкорлик ишларига ривож тилаб, дуога қўл очишди.
