Ҳар ҳафтанинг шанба кунлари белгиланган режага мувофиқ Ромитан туман ҳокими Умеджон Барноев раҳбарлигида фуқаролар қабули ўтказилади. Бугун, 25 февраль куни туман ҳокимининг навбатдаги фуқаролар қабули туман Халқ қабулхонасида бўлиб ўтди.
Ўтказилган фуқаролар қабулида сектор раҳбарлари, Халқ қабулхонаси мудири, туман ҳокими ўринбосарлари, тегишли ташкилот, корхона раҳбарлари, МФЙ раислари ҳамда фуқаролар иштирок этди.
Қабул давомида фуқароларнинг тиббиёт сохасига доир, тадбиркорлик, моддий ёрдам, оилавий масалалар, электр-энергия, газ, ички йўлларни таъмирлаш ҳамда шағаллаштириш, ишга жойлашиш, яшаб турган хонадонини таъмирлаб бериш, банк кредити, кадастр ҳамда ҳуқуқий тушунча йўналишларидаги мурожаатлари тингланди. Фуқаролар қабулида 20 дан ортиқ мурожаат ва таклифлар билдирилиб, 11 та мурожаат жойида ижобий ҳал этилди.
Бундан ташқари туман ҳокими томонидан муддат талаб этиладиган мурожаатлар жойига чиқиб ўрганилиши юзасидан кўрсатмалар бериб ўтилди ҳамда алоқадор ташкилотларга мурожаатларнинг ижросини тезроқ ва аниқ муддатларда бажариш юзасидан кўрсатма ва топшириқлар берилди.
Бундан ташқари фуқаролар қабули давомида мурожаатчилар эҳтиёжидан келиб чиққан ҳолда “Маҳалла” хайрия жамоат фонди ҳузуридаги “Саховат кўмак” жамғармаси маблағлари ҳисобидан 4 нафар фуқароларга 13 хил турдаги озиқ-овқат маҳсулотлари топширилди.
