Шофиркон туманида ижтимоий кўмакка муҳтож бўлган, дафтарларга киритилган оилаларнинг фарзандлари, асосан, мактабгача таълим муассасалари тарбияланувчиларидан 57 нафарининг суннат тўйи ўтказилди.
Меҳр-саховат тадбири туман ҳокимлиги, “Маҳалла” хайрия жамоат фонди, “Бухоро Агрокластер”, “Бухоро Зарҳал Текс”, “Ромитех” масъулияти чекланган жамияти шаклидаги пахта-тўқимачилик кластерлари ҳамкорлигида ташкиллаштирилди.
Туман марказидаги “Илҳом ” ҳамда “Исломбек” тўйхоналари шу куни болажонлар ва ота-оналари, бобо-бувилари, қолаверса, улар хурсандчилигига шерик бўлган жамоатчилик вакиллари билан гавжум бўлди.
Маросимда сўз олган туман ҳокими Жамшид Шаропов ушбу саховат тадбири мамлакатимизда амалга оширилаётган “Инсон қадри учун” тамойилига асосланган ислоҳотларнинг бир кўриниши эканини таъкидлаб, тўйболаларга эзгу тилаклар билдирди.
Тўйда болаларга янги сарполар кийдирилиб, уларнинг ҳар бирига велосипед ва бошқа совға-саломлар топширилди.
Санъаткорлар ижросидаги куй-қўшиқлар барчага байрам кайфиятини улашди.
