Бухорода 18 ноябрь – Ўзбекистон Республикаси Давлат байроғи қабул қилинган кун муносабати билан “Бир ватанда, бир вақтда, бир масофага, бир мақсадда – бирга югурамиз!” шиори остидаги “Янги нафас” оммавий югуриш мусобақаси бўлиб ўтди.

Марафон Бухоро шаҳридаги “Ситора” болалар боғи ёнидан старт олди. Мусобақа стартида сўз олган Бухоро вилояти ҳокими Ботир Зарипов йиғилганларни Ўзбекистон Республикаси Давлат байроғи қабул қилинганлигининг 31 йиллиги билан қутлади. Мамлакатимизда жисмоний тарбия ва спортни ривожлантириш давлатимиз раҳбари эътиборидаги асосий масалалардан бири эканлигини алоҳида таъкидлади.

Шундан сўнг 7 ёшдан 70 ёшгача бўлган 3 мингдан зиёд иштирокчилар – олий ўқув юртлари талабаларидан тортиб умумтаълим ва спорт мактабларининг ўқувчилари, жамоат ташкилотлари вакиллари, маҳалла фаолларидан фахрийларгача уч километрлик масофа бўйлаб, ғолиблик ва саломатлик учун югуришди. Марафонни ташкил этишда вилоят ҳокимлиги, Ёшлар ишлари агентлиги вилоят бошқармаси, вилоят спортни ривожлантириш бош бошқармаси, вилоят маданият бошқармаси мутасаддилари жонбозлик кўрсатди.

Халқаро енгил атлетика қонун-қоидаларига мувофиқ замонавий тамойиллар асосида ўтказилган марафон якунларига кўра, ғолиблар 4 та тоифада ҳам 3 та номинация бўйича аниқланди. Спорт байрами якунида барча ғолиб ва совриндорлар медаль, диплом ва қимматбаҳо совғалар билан тақдирланди.