Ғиждувон туманида фуқаро истеъмолга яроқсиз ёғ ишлаб чиқариш цехини ташкил этгани аниқланди. Бу ҳақда вилоят ИИБ матбуот хизмати хабар берди.
Маълум қилинишича, Ғиждувон тумани ИИБ ходимлари томонидан ўтказилган тезкор тадбир давомида туманнинг «Буктарой» маҳалласида яшовчи фуқаро Sultan Star МЧЖ раҳбари сифатида фаолият юритиб, туманнинг Бобоғози қишлоғида жойлашган омборхона биносида истеъмолга яроқсиз ёғ ишлаб чиқариш цехини ташкил этган ҳолда ноқонуний фаолият олиб бораётгани фош этилган.
Тадбир давомида ноқонуний цехдан 40 литр пахта ёғи, 520 килограмм техник чигит маҳсулотлари, 310 килограмм кунжара ва 2 комплект Хитой давлатида ишлаб чиқарилган чигитни қайта ишлаш ускунаси ашёвий далил сифатида олинган.
Мазкур ҳолат юзасидан Жиноят кодексининг 186/2-моддаси 1-қисми билан жиноят иши қўзғатилиб, ҳозирги кунда дастлабки тергов ҳаракатлари давом эттирилмоқда.
