Ўзбекистон Республикаси Президенти раҳбарлигида 2023 йил 11 апрель куни «Ёшлар сиёсати соҳасидаги ишлар натижадорлигини ошириш ҳамда улар билан ишлаш тизимини янада такомиллаштириш чора-тадбирлари» юзасидан ўтказилган видеоселектор йиғилишида берилган топшириқлар ижроси бўйича Шофиркон туманидаги маҳаллаларда истиқомат қилувчи 38 нафар ёшлар Бухоро давлат педагогика институти ректорига бириктирилган.
Жорий йилнинг 13 октябрь куни Бухоро давлат педагогика институти ректори Баҳодир Маъмуров томонидан мазкур ёшларнинг муаммолари ўрганилди. Ўрганишлар давомида ректор «Боғиафзал», «Саврак», «Жўйрабод» «Тезгузар», «Темирчи», «Пахтаобот», «Хорин», «Хўжа Ориф» маҳалла фуқаролар йиғинларида истиқомат қилувчи «аҳволи оғир» тоифадаги ёшлар билан учрашиб, уларнинг бандлигини таъминлаш, бўш вақтини мазмунли ташкил этиш бўйича суҳбат ўтказди. Бир қатор ёшлар ахборот ва замонавий технологиялар соҳасига қизиқиши ҳамда бу соҳаларни ўрганмоқчи эканлиги ҳақида айтиб, онлайн курслар ташкил қилишни сўрашди. Ректор ёшларни қўллаб-қувватлаб, яқин кунларда уларга ноутбуклар берилиши, онлайн курслар ташкил қилинишини айтиб ўтди.
Мулоқот давомида моддий ёрдамга муҳтож ва соғлиги ёмонлашган ёшларга ёрдам бериш борасида аниқ манзилли ишлар олиб бориш бўйича вазифалар белгиланди. Баҳодир Маъмуров сўралган масалалар бўйича муаммоларни бартараф этиш бўйича амалий ёрдам берди. Аниқланган муаммолар йўл хариталарига киритилиб, тегишли масъуллар бириктирилди ва ижроси назоратга олинди. Шунингдек, ёшларга озиқ-овқат маҳсулотлари етказиб берилди. Ректор ёшлар муаммоларини ҳал этиш бўйича бу каби ишлар доимий олиб борилишини таъкидлади. Зеро, ёшлар билан ишлаш барча раҳбарларнинг, кенг жамоатчиликнинг, бутун жамиятимизнинг энг устувор вазифасидир.
