Бугун Бухоро давлат педагогика институтида қардош миллат вакилларининг миллий анъана ва урф-одатлари, қадриятлари ҳамда миллийлиги билан яқиндан танишиш мақсадида Қорақалпоқ маданияти кунлари доирасида «Дўстлик» шиори остида маънавий-маърифий тадбир ташкил этилди. Тадбирни Бухоро давлат педагогика институти ректори Баҳодир Маъмуров очиб берди.
«Бухоро давлат педагогика институтида ҳозирги кунда 159 нафар қорақалпоқ юрти ёшлари таҳсил олмоқда ва уларнинг 78 нафари жорий йилда алоҳида квота асосида ўқишга қабул қилинди. Сабр-тоқат ва бағрикенглик тимсоли бўлган азиз қорақалпоқ халқининг ривожи учун барчамиз хизмат қилмоғимиз шарт деб ўйлайман. Сиз азиз қорақалпоқ ёшлари – бизнинг фарзандимизсиз! Ҳар бирингиз биз учун алоҳида дунёсиз! Иқтидорингиз ва билимингиз туфайли дунё сизни танишига ишонаман. Бу йўлда ҳар бирингизга кўмаклашишга тайёрмиз. Чунки Қорақалпоғистоннинг тақдири – бу Ўзбекистоннинг тақдири, қорақалпоқ халқининг бахти ва фаровонлиги – бу бутун ўзбек халқининг бахти ва фаровонлигидир.» деди институт ректори сўзи давомида.
Шунингдек, тадбирда куй-қўшиқлар, саҳна кўринишлари ижро этилди. Иштирокчилар ташаккурномалар билан тақдирланди.
