Ўзбекистон Президенти Шавкат Мирзиёев «Рақобат муҳитини янада ривожлантириш ва иқтисодиётда давлат иштирокини қисқартириш бўйича қўшимча чора-тадбирлар тўғрисида»ги фармонни имзолади. Бу ҳақда «Ўзбекистон 24» телеканали хабар берди, деб ёзмоқда Spot.
Фармонга кўра, 2020 йил 1 октябрдан бошлаб бир турдаги маҳсулот бозорида беш ёки ундан ортиқ хусусий компания мавжуд бўлган тақдирда (мудофаа ва миллий хавфсизлик мақсадида ташкил этилган компаниялардан ташқари), давлат иштирокидаги компаниялар, уларга бириктирилган шахслар ва давлат муассасалари ташкил этилмайди.
Шунингдек, фармонда давлат харидлари механизмига ўзгартиришлар киритилиши кўзда тутилган. Хусусан, 2021 йил 1 январдан бошлаб ижрочилар ғолиб деб эълон қилинган кундан бошлаб икки кун ичида 25 фоиз ва ундан ортиқ улушга эга акциядорлар тўғрисидаги маълумотларни эълон қилиши керак бўлади.
Шу ва бошқа тадбирлар натижасида қуйидагиларга эришиш кутилмоқда:
- монопол корхоналар сони 40 фоизга қисқаради;
- мамлакатнинг халқаро рейтинглардаги ўрни ва инвестицион жозибадорлиги ошади;
- бизнеснинг иштироки кенгаяди;
- иш ўринлари сони кўпаяди.
Эслатиб ўтамиз, Ўзбекистонда қатор корхоналарнинг эксклюзив имтиёзларини бекор қилиш режалаштирилмоқда. Аввалроқ Президент рақобатни ривожлантириш ва монополияга қарши курашиш борасида мутлақо янги тизим яратиш лозимлигини таъкидлаганди ва Ўзбекистон бозоридаги рақобат ҳақида гапирганди.
