Туманнинг “Аттарон” маҳалла фуқаролар йиғинидаги янги ташкил этилган 120 ўринга мўлжалланган 8-сонли Давлат мактабгача таълим ташкилоти фойдаланишга топширилди.
Мактабгача таълим ташкилотининг очилиш маросимида Ромитан туман ҳокимининг биринчи ўринбосари Анвар Очилов, туман ИИБ ўринбосари Сардор Шерназаров, Маҳалла ва нуронийларни қўллаб-қувватлаш бўлими бошлиғи Шухрат Хўжақулов, туман бош имом хатиби Бобир Жўраев, туман Халқ қабулхонаси вакиллари, нуроний ота-онахонлар, МФЙ ходимлари, туман Мактабгача таълим бўлимининг масъул ходимлари, маҳалла фаоллари ва тарбияланувчиларнинг ота-оналари иштирок этишди.
Очилиш маросимида мактабгача таълим ташкилоти тармоғини ҳозирги замон талаблари ва стандартлари асосида ривожлантиришга қаратилаётган эътибор юксак самаралар бераётгани туман ҳокими томонидан таъкидланди.
Тадбир давомида нуронийлар ушбу ишларга бош қош бўлган мутасаддиларга раҳматлар айтиб, ўз миннатдорликларини билдиришди. Шунингдек, соғлом ва баркамол авлодни вояга етказиш, уларни ватанпарварлик руҳида тарбиялаш, маънавий-ахлоқий муҳитни соғломлаштириш ва миллий қадриятларимизни кенг тарғиб этиш, уларни ватанимизнинг муносиб фуқаролари, маънавий етук инсонлар қилиб тарбиялашда, таълим тизимини ривожлантиришда самарали иш олиб боришига ишонч билдирилди.
“Инвестиция” дастури асосида “Бобир Асадбек Темур” МЧЖ раҳбари Толиб Икромов томонидан қурилиш ишлари амалга оширилган муассасанинг лойиҳа қиймати 3 миллиард 583 миллион сўмни ташкил этди. Фойдаланишга топширилаётган мактабгача таълим ташкилотида барча қулайликлар яратилган, гуруҳ хоналари талаб даражасида жиҳозланган, барча шароитлар муҳайё.
Тадбир сўнгида туман ҳокимининг биринчи ўринбосари А.Очилов томонидан қурилиш ишлари жараёнида жонбозлик кўрсатган бир гуруҳ ходимларга эҳтиром рамзи сифатида ўзбекона тўн кийдириб, эсдалик совғаларини топширди.
