Бугун Ромитан тумани ҳокими Умеджон Барноев тегишли раҳбарлар иштирокида тумандаги Афросиёб, Зарафшон, Бобур, Ибн Сино, А.Навоий маҳалла фуқаролар йиғинларидаги кўп қаватли уй-жойларнинг ушбу мавсумга тайёргарлик ҳолати билан танишди.
Ўрганиш давомида тайёргарлик ҳолати бўйича аниқланган камчиликларни зудлик билан бартараф этиш борасидаги топшириқлар ва кўрсатмалар берилди.
Шу билан бирга фуқаролар томонидан келиб тушадиган мурожаатлар билан жиддий ишлаш, куз-қиш мавсумини ўтказиш бўйича йўлга қўйилган штаб фаолиятини мониторинг қилиб бориш туман раҳбари томонидан таъкидлаб ўтилди.
Тумандаги барча кўп қаватли уй-жойлар атрофи ободонлаштирилиб, экин ерлари тартибга келтирилмоқда. Дарахт ва токлар буталанмоқда. Ҳудудни обод қилиш учун махсус техникалар ва 150 дан ортиқ туман Ободонлаштириш бошқармаси ходимлари жалб этилган.
Шу билан бир қаторда, ҳудудларда ободонлаштириш ва кўкаламзорлаштириш тадбирлари олиб борилмоқда. Атроф-муҳитда кузги юмушлар бажарилиб, манзарали гуллар, мевали ва дарахт кўчатларини экиш ҳаракатлари бўлиб ўтмоқда. Ҳудудлар кун сайин янада кўркам, янада ёқимли кўриниш ясамоқда.
