Бошоқли дон экинларининг экиш муддатларини тўғри белгилаш зарур тадбирлардан бири бўлиб, келгуси йил ҳосили тақдирини белгилайди.
Ҳудуднинг тупроқ-иқлим шароитидан келиб чиққан ҳолда кузги буғдой уруғини экиш ишларининг мақбул муддатларда ўтказилиши уруғни бир текис ундириб олиш, қишки тиним даврига кириш учун тайёргарлик ҳолатининг яхши ўтиши, меъёрида қишлаш ва юқори ҳосил беришини таъминлайди.
Шу муносабат билан бугун Ромитан туманидаги “Ромитан” ҳудудида жойлашган “BCT Agrokompleks Cluster” даласида 2024 йил ғалла ҳосили учун кузги бошоқли дон экиш бўйича кўргазмали семинар бўлиб ўтди.
Семинарда туман ҳокими Умеджон Барноев, туман ҳокими ўринбосарлари, туман қишлоқ хўжалиги бўлими ходимлари, ҳудуд раислари, алоқадор ташкилот, корхона, ғаллачилик кластерлари ва фермер хўжалик раҳбарлари иштирок этди.
Кўргазмали семинарда туман ҳокими Умеджон Барноев сўзга чиқиб, мавсумолди экин ерлари ва техникаларни шай ҳолатга келтириш, минерал ўғит ва уруғликни экин ерига тайёрлаш ҳамда экиш отрядлари ишлаётган далагача етказиб беришни таъминлаш, кузги бошоқли дон экинлари экиш ишларини уюшқоқлик билан оптимал муддатларда тизимли равишда ташкил этиш, дон экиш ишларига замонавий ускуналарни жалб қилиш бўйича тегишли масъулларга кечиктириб бўлмас вазифаларни белгилаб берди.
Шундан сўнг туман ҳокимининг қишлоқ ва сув хўжалиги масалалари бўйича ўринбосари Аброр Рахматов семинар иштирокчиларига дала атрофида “Бойиш” усулида узумзорларни ташкил қилиш, терак ва тут кўчатларини ўтқазиш бўйича топшириқлар берди.
Кўргазмали семинар сўнгида Россия Федерацияси Москва шаҳрида фаолият юритаётган “БИОИН-НОВО” МЧЖ раҳбари Татьяна Нугманова қишлоқ хўжалиги экинларини парваришлашда биологик препаратларни қўллаш меъёрлари, афзалликлари ҳамда хусусиятлари ҳақида ўз тавсияларини бериб ўтди.
Маълумот учун, Ромитан туманида 2024 йил ғалла ҳосили учун 5 980 гектар майдонда кузги бошоқли дон экиш ишлари йўлга қўйилган бўлиб, уруғ навларини танлашга ҳам алоҳида эътибор қаратиб келинмоқда. Хусусан, ушбу мавсумда “Алексеич”, “Гром”, “Васса”, “Старшина” ва “Аср” каби юқори сифат кўрсаткичли дон уруғлари экилиши режалаштирилган.
