Барчамизга маълумки, бошоқли дон экинлари экишда сифатли уруғ, ер майдонининг текислиги, минерал ўғитларнинг ўз вақтида берилиши ва бошқа агротехник тадбирларни белгиланган муддатларда сифатли амалга ошириш ниҳоятда зарур тадбирлардан бири бўлиб, ушбу амаллар келгуси йил ҳосили тақдирини белгилашда муҳим аҳамият касб этади.
Жорий йилда Ромитан туманида 2024 йил ҳосили учун жами 7421 гектар майдонга кузги бошоқли дон экинлари ҳозирги кунда парваришланмоқда.
Бу йил қиш фасли ўтган йилларга нисбатан бироз илиқ келаётганини инобатга олиб тумандаги соҳа мутахассислари, алоқадор ташкилот, корхона ва фермер хўжалиги раҳбарлари иштироқида тумандаги бошоқли дон экилган майдонларда занг ва бошқа касалликларни, шунингдек, зараркурандаларни тарқалишини олдини олиш ва уларга қарши курашиш, агротехник тадбирларни амалга ошириш ишларини тизимли ташкил этиш бўйича кўргазмали ўқув семинар ташкил этилди.
Туман ҳокимлигининг катта мажлислар залида ташкил этилган семинарда кун тартибидаги масалалар юзасидан Ўзбекистон Республикаси Қишлоқ хўжалиги вазирлиги масъул ходими С.Пирнафасов, Лалмикор деҳқончилик илмий тадқиқот институти лаборатория мудири Н.Умиров, Ўсимликлар карантини ва ҳимояси илмий тадқиқот институти лаборатория мудири Қ.Бабабеков, вилоят Қишлоқ хўжалиги бошқармаси бошлиғи А.Жаводовлар сўзга чиқиб, ғалла парваришида бажарилиши лозим бўлган муҳим агротехник тадбирлар бўйича ўз тавсияларини бериб ўтди.
Семинар давомида 2024 йил ҳосили учун экилган кузги бошоқли дон экинларидан юқори ҳосил этиштириш бўйича зарур тавсиялар берилди. Шунингдек, семинар иштирокчиларига агротехник тадбирлар ўтказиш тартиби мутахассислар томонидан тушунтириб ўтилди.
