Cоғлиқни сақлаш вазирлиги томонидан тасдиқланган “Рецептсиз бериладиган дори воситалари рўйхати”да халкаро патентланмаган номи (дори воситаси таркибидаги фаол модда (субстанция)нинг номи) билан 192 та дори препаратлари ва савдо номи билан 1032 та мажмуавий препаратлар киритилган.
Бу рўйхатда бўлмаган дори воситасини шифокор рецептисиз сотишга белгиланган жавобгарлик тўғрисида Соғлиқни сақлаш вазирлиги ҳузуридаги фармацевтика тармоғини ривожлантириш агентлиги бошқарма бошлиғи Муҳаббат Ибрагимова маълумот берди:
— Рецептсиз бериладиган дори воситалари мамлакатимиз фармацевтика бозорининг тахминан 30 фоизини ташкил этади. Ҳатто врач рецептлари асосида бериладиган дори воситалари, тиббий буюмлар ва улар ҳақидаги маълумотларни дорихонанинг пештахтаси ва харидорлар учун кўринадиган бошқа жойларга қўйиш тақиқланади.
Қонунчиликка кўра, таркибида кучли таъсир қилувчи моддалар, гиёҳвандлик воситалари ва психотроп моддалар мавжуд бўлмаган дори воситаларини рецептсиз сотиш базавий ҳисоблаш миқдорининг беш бараваридан ўн бараваригача жаримага сабаб бўлади. Таркибида кучли таъсир қилувчи моддалар мавжуд бўлган дори воситаларини рецептсиз сотиш эса базавий ҳисоблаш миқдорининг эллик бараваридан юз бараваригача жаримага сабаб бўлади. Мазкур тартиб 2020 йил 23 октябрдан кучга киради.
Бу қонунбузарликни дорихона мунтазам равишда (бир йил давомида икки ва ундан ортиқ марта) амалга оширса, бу холат лицензия талаблари ва шартларини қўпол равишда бузилиши ҳисобланиб, лицензиянинг амал қилиши белгиланган тартибда тўхтатилишига олиб келади.
