Бўйи баланд ғўза ниҳолларининг ҳосили бўлиқ. Биринчи терими якунланган пайкаллар ҳам яна оқликка бурканибди. Кўсакларнинг-ку саноғи йўқ.
Олим Хўжаев фермерлик қилаётган “Шердор” хўжалиги даласидамиз. Тушлик маҳали бўлгани боис теримчилар даланинг ўзида овқатланяпдилар. Ошпаз йигит ҳар бир теримчига бир марталик ишлатиладиган идишларда таом улашмоқда. Пахтага тўлаётган тележка олдида самоварда чой қайнаяпти.
– Тушликкача энг кўп пахта терган ким?
Отряд бошлиғи Меҳригиё Ғафурова дарров дафтарини очиб, пешқадамларни аниқлаб берди:
Истат Аҳмадова, Насиба Расулова, Гулсанам Нусратова, Ойдиной Шароповалар тушликкача 90 килограммдан ошириб пахта теришибди.
Туман ҳокими ўринбосари, хотин-қизлар қўмитаси раиси Зулхумор Аслонова, “Ромитаннома” газетаси бош муҳаррири Махфират Атоева, Боғча маҳалласи раиси Давлат Облобердиевлар илғор теримчиларга совғалар топширдилар.
Тушликдан бўшаган теримчилар яна эгатларга шўнғидилар. Уларнинг кучи билан фермер хўжалиги кунига 10 фоизгача пахта топширмоқда. Ғалабага бир баҳя қолди. Дала қаҳрамонлари буни юракдан ҳис этади.
Далада етиштирилган, меҳнат ва машаққатлар меваси – “оқ олтин”ни тезроқ йиғиштириб олиш бурч, масъулият эканини тушуниб етишган.
Пахтазор дилида ўти борларни чорлайди!
