“Инсон қадри учун” шиори доирасидаги чуқурлаштирилган тиббий кўриклар туманларда давом этмоқда. Республика шошилинч тиббий ёрдам илмий маркази Бухоро филиали директори т.ф.н.М.Ражабов бошчилигидаги РШТЁИМ Бухоро филиалининг 31 нафар турли соҳа мутахассислардан ташкил топган ишчи гуруҳ навбатдаги тиббий кўрик ва амалий-услубий ёрдам акцияларини Пешку туманида амалга оширишга киришдилар.
Мутахассислар гуруҳи томонидан Пешку туманининг кўп тармоқли марказий поликлиникасида чуқурлаштирилган тиббий кўрик ташкил қилинди. Филиалдан эндохирург, қон-томир хирурги, гинеколог, травматолог, нейрохирург, болалар хирурги, болалар реаниматологи, УТТ врачи, эндоскопист, кардиореаниматолог, анестезиолог-реаниматолог, невролог, кардиолог, терапевт, педиатр, токсиколог ва операцион бригада тўлиқ стерил тиббий асбоб-анжомлар тўплами ҳамда мутахассислар билан ташриф буюришган.
Республика шошилинч тиббий ёрдам маркази Бухоро филиали билан узвийлик ва ўзаро алоқа олиб бориш, туман мутахассисларини тажриба орттиришига кўмаклашиш, беморларга тиббий ёрдам стандартларига мувофиқ маслаҳат ва диагностика, даволашни амалга ошириш борасидаги ишлар кўриб чиқилмоқда. Шунингдек, марказ тўғрисида тушунтиришлар берилиб, мутахассисларнинг тажриба орттиришига кўмаклашиш орқали амалий-услубий ёрдам кўрсатилиши ҳам таъминланади.
Пешку туманида РШТЁИМ Бухоро филиали мутахассислари томонидан ташрифнинг биринчи кунида 261 нафар фуқаролар чуқурлаштирилган тиббий кўрикдан ўтказилдилар. Шулардан 78 нафарида турли йўналишдаги касалликлар, жумладан: 70 фоизидан ортиғида терапевтик, 20 фоизида хирургик соҳадаги ва 7 фоизида гинекологик ҳамда 3 фоизига яқин болаларда педиатрик касалликлар мавжудлиги аниқланди.
Шунингдек туман тиббиёт бирлашмаси ва кўп тармоқли поликлиника билан аниқланган беморлар рўйхати шакллантирилиб, туман, вилоят миқёсидаги даволаш муассасаларида уларни соғломлаштириш режалари тузилди. Бу орқали соғлом турмуш тарзини тарғиб этиш, аҳолининг тиббий хизмат билан қамраб олиш, турли юқумли касалликлар хавф омилларини вақтли аниқлашга имкон яратиш, аҳолининг тор мутахассислар ва бирламчи бўғини орасида самарали интеграция механизмларини жорий қилиш, аҳолининг турмуш тарзини яхшилаш ва тиббиёт муассасаларига бўлган ишончини ортиши ҳамда беморларнинг тиббий маданиятининг ошишига эришилиши мақсад қилиб қўйилган.
Чуқурлаштирилган тиббий кўрик давомида аниқланган 4 нафар беморларда юқори технологик кам инвазив операциялар бажарилди. Операциялар “Маҳорат дарслари” доирасида амалга оширилди.
Чуқурлаштирилган тиббий кўриклар Пешку туманида давом этади.
