Александр Лукашенко Минск Ўзбекистонни Марказий Осиё минтақасидаги асосий ҳамкори деб билишини, мамлакат ҳукумати уни ЕОИИда ҳар томонлама қўллаб-қувватлашга тайёрлигини айтди. Бу ҳақда у Президент Шавкат Мирзиёев билан бугун, 24 июль куни телефон орқали мулоқотда айтиб ўтган.
«Беларус Ўзбекистонни Марказий Осиё минтақасидаги асосий ҳамкори деб билади ва Евросиё иқтисодий иттифоқи билан ҳамкорликда мамлакат иқтисодиётини тўлиқ жалб этишни таъминлаб, уни ЕОИИда ҳар томонлама қўллаб-қувватлашга тайёр», дейилади БEЛТА хабарида.
Суҳбатда Ўзбекистон Беларуснинг Шанхай ҳамкорлик ташкилотига (ШҲТ) аъзо бўлиш ҳақидаги аризасини қўллаб-қувватлаши ҳақида ҳам сўз борган.
Қайд этилишича, мулоқотда ҳамкорликни ривожлантириш учун етарлича истиқболлар мавжудлиги таъкидланган: икки мамлакат бозорларида харидоргир маҳсулотларни ўзаро етказиб беришни кўпайтириш, ҳамкорликни кенгайтириш, янги қўшма корхоналар ташкил этиш. Мирзиёев ва Лукашенко яна бир бор Қорақалпоғистон воқеалари хусусида гаплашган ва у ерда содир бўлган воқеалар юзасидан фикр алмашган.
