Коррупцияга қарши курашиш агентлигига келиб тушган мурожаатга асосан ўтказилган ўрганишда “Когон ёғ экстракция заводи” АЖнинг собиқ мансабдор шахслари томонидан мансаб ваколатларини суиистеъмол қилиш, сохта ҳужжатлар тайёрлаш орқали жамият ва давлат манфаатларига жуда кўп миқдорда моддий зарар етказилганлиги аниқланди.
Маълум бўлишича, 2021–2022 йилларда АЖ томонидан “Ўзсаноатқурилиш банк” АТБ Тўкимачилик БХМдан “айланма маблағларини тўлдириш” мақсадида жами 30,5 млрд сўм кредит олинган.
Кредит таъминоти сифатида АЖга тегишли умумий майдони 150.134 кв.м. бўлган маъмурий ва ишлаб чиқариш бино-иншоотлари 50 млрд сўмга баҳоланиб, гаровга тақдим этилган.
Мансабдор шахслар олдиндан ўзаро тил бириктириб, ушбу кредит маблағларини олиш юзасидан ҳужжатларни расмийлаштириш жараёнида белгиланган тартибда жамиятнинг кузатув кенгаши аъзоларининг розилигини олмасдан расмий ҳужжатларга ёлғон ва сохта маълумотлар киритиб, банкга тақдим этиб келган.
Шунингдек, кредит маблағлари улар томонидан самарасиз ишлатилиши туфайли АЖ ва банк тизимига жами 19,6 млрд сўмга яқин зарар етказилган.
Қайд этилган ҳолатлар бўйича АЖнинг ва бошқа мансабдор шахсларига нисбатан Ўзбекистон Республикаси Жиноят кодексининг тегишли бандлари билан жиноят иши қўзғатилди.
Айни пайтда дастлабки тергов ҳаракатлари олиб борилмоқда.
