Бухорода аҳолига имтиёзли нархда сотилиши керак бўлган 800 тоннадан ортиқ кўмир талон-торож қилинганлиги аниқланди, дея хабар бермоқда ДХХ ахборот хизмати.
Маълум қилинишича, Давлат хавфсизлик хизмати ходимлари томонидан Иқтисодий жиноятларга қарши курашиш департаменти билан ҳамкорликда вилоятда текширув ишлари ўтказилган.
Натижада, бир нечта туманларда кўмир маҳсулотлари талон-торож қилинганлиги ҳолатлари аниқланган.
Хусусан, “Кўмир таъминот” МЧЖнинг Бухоро вилоят филиали Вобкент кўмир омборида аҳолига имтиёзли нархда етказиб берилиши керак бўлган 455,7 тонна, Олот кўмир омборида 205,3 тонна, Қоракўл кўмир омборида 78 тонна, Жондор кўмир омборида эса 67,4 тонна кўмир ноқонуний сотиб юборилганлиги маълум бўлди.
“Мазкур кўмир омборларининг мансабдор шахслари ва бошқаларга нисбатан ЖКнинг 167-моддаси 2-қисми билан жиноят ишлари қўзғатилиб, тергов ҳаракатлари олиб борилмоқда”, — дейилади хабарда.
