Давлатимиз раҳбарининг жорий йил 2 майдаги “Иккинчи жаҳон уруши қатнашчиларини рағбатлантириш тўғрисида”ги Фармони асосида мамлакатимизда 9 май – Хотира ва қадрлаш куни умумхалқ байрами сифатида кенг нишонлашга, шунингдек, Иккинчи жаҳон урушида ҳалок бўлган аждодларимиз хотирасини абадийлаштириш борасида кенг кўламли ишлар олиб борилмоқда. Жумладан, фашизм устидан қозонилган ғалабанинг 78 йиллиги муносабати билан Иккинчи жаҳон уруши қатнашчилари ва ногиронларининг ҳар бири 18 миллион сўм миқдорида бир марталик пул мукофоти билан тақдирланмоқда.
Шу жиҳатдан Хотира ва Қадрлаш куни байрами арафасида Ҳожимурот ота Бектошевнинг қалби чексиз қувончга тўлди. Шинамгина ҳовлиси маҳалладошлари, фарзандлари ва неваралари билан гавжум бўлди.
Шу куни вилоят ҳокими Ботир Зарипов, вилоят секторлари ҳамда давлат ва жамоат ташкилотлари мутасаддилари Ҳожимурот отанинг файзли хонадонига ташриф буюришди.
Учрашувда Ботир Зарипов Президентимизнинг Иккинчи жаҳон урушида қозонилган ғалабанинг 78 йиллиги ҳамда Хотира ва қадрлаш куни муносабати билан йўллаган байрам табригини ўқиб эшиттирди. 18 миллион сўм миқдоридаги пул мукофоти ва байрам совғаларини топширди. Президентимиз номидан тақдим этилган олтин суви юритилган “Шердор” соати эса уруш фахрийларига бўлган чексиз ҳурмат рамзи бўлди.
Шунингдек, отахон вилоят ҳокимлиги, “Нуроний” жамғармаси томонидан ҳам моддий рағбатлантирилди. Бундан ташқари, уруш фахрийсига вилоят мудофаа ишлари бошқармаси, Ўзбекистон мудофаасига кўмаклашувчи “Ватанпарвар” ташкилоти вилоят Кенгаши ва бошқа ташкилотлар томонидан ҳам эҳтиром кўрсатилди.
Жанубий-ғарбий ҳарбий округ қўшинлари Бухоро гарнизони ҳарбий хизматчиларининг тарғибот жамоаси ҳам бу хонадонда бўлиб, иззат-икром кўрсатди.
Вилоят ҳокими Ботир Зарипов ҳамда давлат ва жамоат ташкилотлари мутасаддилари Назар ота Шеровнинг хонадонида ҳам бўлишди. Ботир Зарипов уруш ва меҳнат фахрийсига Президентимизнинг Иккинчи жаҳон урушида қозонилган ғалабанинг 78 йиллиги ҳамда Хотира ва қадрлаш куни муносабати билан йўллаган байрам табригини ўқиб эшиттирди. Отахонга 18 миллион сўм миқдоридаги пул мукофоти ва қимматбаҳо совғаларни топширди. Шунингдек, отахон вилоят ҳокимлиги, тегишли ташкилотлар томонидан ҳам алоҳида рағбатлантирилди.
Шу куни мутасаддилар Бухоро тумани “Туркон” маҳалласида яшовчи Иккинчи жаҳон уруши қатнашчиси, 101 ёшли Файзулло Ҳожиев, Бухоро шаҳри Шофиркон кўчасида яшовчи уруш фахрийси, 96 ёшли Норбой Қаршиев, Чашмайи Аюб кўчасида яшовчи 98 ёшли Аҳмад Муҳсинов, “Ширбудин” маҳалласида яшовчи 94 ёшли Иккинчи жаҳон уруши қатнашчиси Рейда Ресутова, “Ширбудин” кўчасида яшовчи Катизе Менсеитова хонадонида ҳам бўлишди.
Учрашувларда фахрийлар оғир уруш йиллари ва қаҳатчилик давридаги халқимиз матонати, сабр-тоқати, эртанги ёруғ кунларга бўлган қатъий ишончи орзиқиб кутилган ғалабани яқинлаштирганини, ўт-оловли жанггоҳларда кўплаб бухоролик жангчилар ўз жонини фидо қилганини таъкидлашди.
Вилоят раҳбари уруш фахрийларини самимий табриклаб, Президентимизнинг байрам табригини ўқиб эшиттирди ва пул мукофоти ҳамда қимматбаҳо совғаларни топширди.
