Йўлларда сергак юриш ва йўл ҳаракати хавфсизлигига риоя қилиш инсон учун муҳим мезон саналади. Гоҳ шошиб, гоҳида турли ўй-хаёллар туфайли инсон шу оддий мезонни унутади ё унга масъулиятсизлик билан қарайди.
Мана шундай вақтларда фуқароларга кўмак сифатида Бухоро давлат педагогика институти талабалари ташаббуси билан пиёдалар ўтиш жойларида навбатчилик ташкил этилди. Бу йўллардан ўтувчиларнинг ҳушёрлигини оширишга хизмат қилмоқда.
– Пиёдалар ўтиш жойларида навбатчилик ташкил қилганмиз. Бу каби ишлар фаолиятимиз учун амалиёт вазифасини ҳам ўтамоқда, – дейди институт Ҳарбий таълим факультети талабаси Дилшод Сатторов. – Шаҳримиз аҳолисининг хавфсизлигини таъминлашда бироз ҳиссамиз қўшилаётганидан мамнунмиз. Халқимиз осойишталиги йўлида доимо хизмат қилишга тайёрмиз.
Дарҳақиқат, талабаларнинг мазкур ташаббуси йўлдан ўтаётган ҳар бир инсоннинг хавфсизлиги учун муҳим. Айниқса, турли об-ҳавода ёши улуғ инсонлар ёки ёш болаларга бу каби хайрли ишлар инсонийлик белгиси.
Йўл ҳаракати қоидаларига риоя этиш, йўл ҳаракати иштирокчиларининг хавфсизлигини таъминлаш турли кўнгилсиз ҳодисаларнинг олдини олади.
Керакли билимга эга ва махсус кийимдаги кўнгилли талабалар факультет биноси ҳамда институтнинг бир қатор факультетлари биноси ёнидаги пиёдалар ўтиш жойларида навбатчилик қилмоқда.
Бу хайрли ишлар йўловчиларнинг хавфсизлиги учун доимий равишда давом этади.
