Инсоният яралибдики, унинг маънавий юксалишига бешик бўлган, тарихи бир неча минг йиллик тарихга бориб тақаладиган, дунёнинг барча тараққиёт босқичларига гувоҳ бўлган, бағрида ҳам олис ўтмиш, ҳам бугунги тамаддун жараёнларини намоён этувчи бир маскан бор. Бу маскан, шубҳасиз, маҳалладир. Маҳалла – халқ билан мамлакат ўртасидаги ишонч кўприги сифатида хизмат қиладиган, инсонни жамиятнинг бир қисми бўлишга ўргатадиган, уни бағрикенглик ва халқпарварлик руҳида тарбиялайдиган макондир. Жонажон диёримизда маҳаллалар жуда кўп бўлиб, уларнинг ўзига хос номлари бизга тарихдан сўзлайди. Чунки уларда халқимизнинг узоқ ва шонли тарихи, ижтимоий-сиёсий, иқтисодий ҳаёти, маданий мероси акс этади.
Мана шундай буюк қадриятлар маскани бўлмиш маҳаллаларга эътибор давлатимиз раҳбари томонидан кун тартибига қўйилган. Шарққа хос маданиятни ўзида жамлаган маҳаллаларимиз нуфузини ошириш, маҳалла орқали юртимиз ривожи учун хизмат қилиш бурчимиздир. Президентимиз ўз нутқларида “Биз фаолиятимизнинг биринчи кунларидан ҳамма ишни маҳаллада, халқимиз билан биргаликда ташкил қилиб келяпмиз. Бу тизимни босқичма-босқич ривожлантирдик. Энди яна қўшимча куч, имкониятлар бериляпти. Бу ҳам ваколат, ҳам масъулият дегани. Маҳаллалар – давлатимизнинг энг катта замини” деб таъкидлаганлари ҳам бежизга эмас. Чунки маҳаллалар том маънода халқнинг дардини енгил қилувчи, уларнинг ишончли маконига айланмоқда.
2024 йил 29 апрель куни Бухоро давлат педагогика институти ва Бухоро шаҳридаги “Ҳамид Олимжон” маҳалла фуқаролар йиғини ҳамкорлигида “Файзли маҳалла – юрт кўрки” шиори остида маънавий-маърифий тадбир ўтказилди. Унда Бухоро давлат педагогика институти ректори, Халқ депутатлари Бухоро шаҳар Кенгаши депутати Баҳодир Маъмуров, МФЙ раиси Собира Жўраева ҳамда еттилик вакиллари, маҳалла фаоллари, ўқитувчилар, ёшлар ва оммавий ахборот воситалари вакиллари иштирок этди.
Тадбирни кириш сўзи билан ушбу сайлов округдан сайланган Халқ депутатлари Бухоро шаҳар Кенгаши депутати Баҳодир Маъмуров очиб берди. Тадбирда сўзга чиққанлар, маҳалла халқ билан мамлакат ўртасидаги ишонч кўприги сифатида хизмат қиладиган, инсонни жамиятнинг бир қисми бўлишга ўргатадиган, уни бағрикенглик ва халқпарварлик руҳида тарбиялайдиган макондир, дея таъкидлашди. Шунингдек, ҳозирги кунда банклар томонидан ажратилаётган имтиёзли кредитлар, ёшлар учун яратилган имкониятлар ҳақида батафсил айтиб ўтилди.
Тадбир давомида “Уч авлод учрашуви”, “Беш ташаббус” лойиҳалари, спорт мусобақалари, “Заковат” интеллектуал ўйини, ҳарбий ватанпарварлик бўйича чиқишлар, “Muzqaymoq party” лойиҳаси, “Гулхан шоу” кўнгилочар дастури ташкил этилди. Якунда миллий таомимиз бўлган ош дастурхонга тортилди. Фаол иштирокчилар ташаккурнома ва эсдалик совғалари билан тақдирланди.
