Бугун кўпчилик япония компанияси дорилари хақида кўп гапиришмоқда.
Бунга сабаб, жойларда шундай маҳсулотлар рекламаси кучайиб бораётганидан бўлса керак.
Мисол учун, Бухоро шаҳридаги собиқ “Дилкушо” ёпиқ бозори қаршисидаги “Давр банк”нинг тепа қаватида ўзини Япония табиий дори маҳсулотлари компанияси вакиллари деб атаган бир гуруҳ фуқаролар мазкур компания дори маҳсулотларини реклама қилишмоқда.
Айтилишича, улар таклиф қилаётган ушбу дори маҳсулотлари 150 дан ортиқ кассалликларни даволаш хусусисиятига эга экан. Ажабланарлиси, барча касалликларга бир хил дори воситалари (фарқи фақат уларнинг кам ва кўплигига қараб нархида – 75$ дан 800$ гача) берилади.
Шу ерда савол туғилади:
- Ушбу компания дори маҳсулотлари(таркиби ўрганилган ҳолда)га мамлакатимизда сотишга рухсат берилганми? Ёки улар давлат рўйхатидан ўтказмасдан олиб кириладиган айрим фармацевтика маҳсулотлари рўйхатига киритилганми?
- Ушбу дори воситаларини мутахассислар таклиф қиляптими? Чунки, ушбу дори маҳсулотларини харид қилган фуқаролар уларни ичиш бўйича шифокор билан эмас, сотувчилар билан маслаҳатлашмоқда.
Яқинда ушбу компания Бухоро шаҳридаги меҳмонхоналардан бирида ҳам ўз аъзолари иштирокида (уларга пул ва қимматли совғалар ваъда қилиняпти) семинар ҳам ўтказди.
У ерда таъкидланишича, ушбу дори воситалари ноёб, энг самарали, энг хавфсиз деб мақталган, аммо қарши кўрсатмалар ҳақида бирон бир маълумот берилмаган.
Ана шундай рекламаларга учаётган одамлар кўпинча ўзини-ўзи даволашга уринмоқда, аниқ ташхисни билмасдан, рекламага ишониб, турли дориларни қабул қилмоқда.
Афсуски, бу каби хатолар акс таъсирларни келтириб чиқармаслигига ҳеч ким кафолат бера олмаса керак. Ҳолбуки, уларни тарғиб қилишдан молиявий манфаат кўзланаётгани ҳеч кимни қизиқтирмаяпти.
