Бухоро нефтни қайта ишлаш заводининг 25 йиллиги муносабати билан Бухоро шаҳридаги Ёшлар марказида тадбир ташкил этилди.
Тадбирда Энергетика вазирлиги, “Ўзбекнефтгаз” АЖ мутасаддилари, хорижий ҳамкорлар, вилоят секторлари раҳбарлари, завод ишчи-ходимлари ва оммавий ахборот воситалари ходимлари иштирок этишди. Тантанали тадбирда вилоят ҳокими Ботир Зарипов сўзга чиқиб, заводнинг 25 йиллик юбилейи билан самимий қутлади.
Завод дастлаб ташкил этилган вақтда фақатгина 7 турдаги маҳсулотлар ишлаб чиқарилган бўлса, бугунги кунга келиб маҳсулотлар ҳажми 20 турдан ортди. Мазкур маҳсулотларнинг 70 фоизи сўнгги беш йилликда ишлаб чиқарила бошлангани Янги Ўзбекистоннинг илк юксалиш йилларида амалга оширилаётган ислоҳотлар, ҳукуматимиз томонидан йўналтирилган йўналтирилаётган маблағлар завод ҳаётида нечоғли муҳим аҳамият касб этаётганлигидан далолат беради.
Айни пайтда автобензинлар ишлаб чиқариш ҳажми 35 фоизга, суюлтирилган газ 50 фоизга ва бошқа турдаги маҳсулотлар ўртача 20 фоизга оширилиши режалаштирилмоқда. Бу эса яна 300 нафар янги иш ўрни манбаи деганидир.
Тантана давомида шонли сана муносабати билан завод ишчи-ходимларидан бир гуруҳи вилоят ҳокимлиги, “Ўзбекнефтгаз” АЖ, шунингдек, Ўзбекистон Касаба уюшмалари Федерацияси томонидан тақдирланишди.
