Коррупция жиноятида айбдор деб топилган шахслар махсус электрон рўйхатга киритилади ва уларга қатор чекловлар қўлланилади.
Президент томонидан имзоланган янги қонунга мувофиқ, Ўзбекистонда коррупцияга оид жиноятларни содир этган шахсларнинг электрон реестри юритилади. Реестр Коррупцияга қарши курашиш агентлиги томонидан Ички ишлар вазирлиги билан ҳамкорликда шакллантирилади.
Қонунга кўра, коррупция жиноятида айбдор деб топилган шахс ҳақидаги маълумотлар суд ҳукми қонуний кучга кирганидан кейин 3 иш куни ичида реестрга киритилади. Маълумотлар судланганлик муддати давомида сақланади.
Электрон реестрга киритилган шахслар давлат хизматига қабул қилинмайди, давлат мукофотлари билан тақдирланмайди, сайлов ва тайинлов орқали эгалланадиган айрим лавозимларга номзод сифатида кўрсатилмайди.
Қонун 2026 йил 23 июндан кучга кирди.
