Президент Шавкат Мирзиёев Бокуда ўтказилаётган Бутунжаҳон урбанизация форумининг 13-сессияси доирасидаги Етакчилар саммитида мамлакатдаги демографик ва шаҳарсозлик жараёнлари ҳақида маълумот берди.
Давлат раҳбарининг таъкидлашича, яқин 15 йил ичида Ўзбекистон аҳолиси ҳозирги 38 миллиондан 50 миллион нафаргача ошиши, урбанизация даражаси эса 51 фоиздан 65 фоизга етиши прогноз қилинмоқда.
Шу муносабат билан мамлакатда уй-жой қурилиши ва шаҳар инфратузилмасини ривожлантириш бўйича кенг кўламли ишлар амалга оширилмоқда.
Жумладан:
▪️ сўнгги ўн йилда қурилаётган уй-жойлар ҳажми 10 баробарга ошиб, 2025 йилда 238 мингта хонадонга етган;
▪️ 2030 йилгача ушбу кўрсаткични яна 1,5 баробарга ошириш режалаштирилган;
▪️ аҳолини арзон уй-жой билан таъминлаш дастурлари учун ҳар йили давлат бюджетидан қарийб 2 миллиард доллар йўналтирилмоқда;
▪️ норасмий турар жойлар муаммосини ҳал этиш мақсадида 2024 йилда алоҳида қонун қабул қилиниб, 100 мингга яқин уй-жой ҳужжатлаштирилган;
▪️ реновация дастурлари орқали эски уй-жойларни янгилаш ва янги қурилишларда улар улушини 15 фоиздан 60 фоизгача етказиш мақсад қилинган.
