Вилоят ҳокими Б. Зарипов томонидан 2026 йил 5 май куни тасдиқланган ҳужжатга кўра, ҳудудларда камбағалликни қисқартириш, аҳоли бандлигини таъминлаш ва тадбиркорликни ривожлантириш кўрсаткичлари таҳлил қилинди. Таҳлил натижалари айрим маҳаллаларда ишлар етарли даражада ташкил этилмаганини кўрсатди.
Хусусан, Ғиждувон туманидаги «Барака» (23%), «Додарак» (33%), Когон туманидаги «Ўзбекистон» (26%), Бухоро туманидаги «Қўшходим» (40%) ва Шофиркон туманидаги «Темирчи» (40%) маҳаллаларида вилоят бўйича энг паст кўрсаткичлар қайд этилган.
Мазкур камчиликларга йўл қўйгани учун тегишли тижорат банклари раҳбарлари, туман ва шаҳар ҳокимларининг биринчи ўринбосарлари ҳамда «маҳалла еттилиги» вакилларига нисбатан интизомий жазо чораларини кўриш, ҳатто уларнинг лавозимида қолиш-қолмаслик масаласини кўриб чиқиш бўйича топшириқ берилди.
Шунингдек, Бухоро шаҳрида ижтимоий-иқтисодий ривожлантириш ва ишсизликни камайтиришда сусткашликка йўл қўйгани учун шаҳар ҳокимининг биринчи ўринбосари У.Х. Задаевга нисбатан ҳам интизомий жазо чорасини қўллаш ва уч кун муддатда ҳисобот бериш вазифаси юклатилди.
Ушбу масалаларнинг ижроси вилоят ҳокимлиги ташкилий-кадрлар гуруҳи томонидан алоҳида назоратга олинди.
