2025 йил 17 октябр куни Қоровулбозор тумани ҳудудидаги йўл ёқасидан чўпон томонидан уст қисман тупроқ билан ёпилган жасад топилди. Ҳуқуқни муҳофаза қилувчи идоралар томонидан ўтказилган текширувда марҳум пичоқлаб ўлдирилгани аниқланган.
Haberturk нашри ёзишича, жасаднинг шахсини аниқлаш жараёнида уни ташлаб кетган автомобилнинг давлат рақами орқали муҳим изга чиқилган. Машина 51 ёшли Туркия фуқароси Суат Т. томонидан ижарага олингани маълум бўлган. Автомобилда ўтказилган луминол текшируви орқали қон излари аниқланиб, улар жасаддан олинган намуналар билан мос келган.
Кейинчалик Ўзбекистон томонидан юборилган ДНК намуналари Туркияда бедарак йўқолган деб эълон қилинган 49 ёшли Кадир Тунчнинг фарзандларидан олинган намуналар билан солиштирилган. Натижада жасад Кадир Тунчга тегишли экани тасдиқланган.
Терговга кўра, Суат Т. ва Кадир Тунч Ўзбекистонда ресторан очишни режалаштирган. Келишув амалга ошмай қолгач, улар ўртасида автомобил ичида жанжал чиққан. Суатнинг айтишича, у шеригига 20 минг доллар берган ва пулни қайтариш масаласида тортишув келиб чиққан. Жанжал чоғида Кадир Тунч пичоқланган ва воқеа жойида вафот этган.
Гумонланувчилар жасадни йўлдан ичкарига олиб кириб, устини тупроқ билан ёпиб кетган ва Истанбулга қайтиб кетган. Суат Т. ҳамда яна 3 нафар гумонланувчи Истанбул Жамоат хавфсизлиги бошқармаси томонидан қўлга олинган. Улар айбни тан олган.
Ҳозирда 4 нафар гумонланувчига нисбатан тергов якунланиб, жиноят иши судга оширилган.
