Республика шошилинч тиббий ёрдам илмий маркази Бухоро филиалида 14-15-16-17 апрел кунлари “Эндоскопияда замонавий илғор технологиялар” мавзусига бағишланган ўқув-амалий семинари илк бор ўтказилди. Семинарга Россия Федерацияси Санкт-Петербург шаҳри академик И.П.Павлов номидаги тиббиёт университети клиникаси эндоскопия бўлими мудири, бош эндоскопист т.ф.д. профессор Смирнов Александр Александрович, Германия Республикаси ERBE компанияси бош мутахассиси Ковалев Павел Александрович, Академик Вохидов номидаги Республика хирургия маркази бош мутахассиси, эндоскопист-Джуманиёзов Джавохир Азатбоевич ва РШТЁИМ бош мутахассиси, эндоскопист Хошимов Миркамол Ахмеджановичлар ташриф буюрдилар. Илмий-амалий семинарда шунингдек вилоятнинг барча шаҳар ва туманларидан эндоскопистлар, хирурглар ва соҳага оид мутахассислар фаол иштирок этдилар.
Семинарда тасдиқланган кун тартибига биноан соҳанинг етук олимлари, профессорлар, етакчи мутахассислар томонидан қизилўнгач касалликларини эндоскопик-оператив даволаш, кардиал ахалазияси, қизилўнгач моторикасининг спастик бузилишлари, қизилўнгач шиллиқ ости ҳосилалари, қизилўнгач бўйин қисми дивертикулари, турли этиологияли қизилўнгач торайишлари, ошқозон-ичак трактининг эрта ўсмаларини эндоскопик шиллиқ ости (ESD) диссекцияси мавзуларида маърузалар бўлиб ўтди.
Шу билан бирга, қизилўнгач касалликлари эндоскопик-оператив даволаш, кардиал ахалазияси, қизилўнгач моторикасининг спастик бузилишлари, қизилўнгач шиллиқ ости ҳосилалари, қизилўнгач бўйин қисми дивертикулалари, турли этиологияли қизилўнгач торайишлари ва ошқозон-ичак трактининг эрта ўсмаларини эндоскопик шиллиқ ости (ESD) диссекцияси каби мураккаб юқори технологик эндоскопик Республика миқёсидаги операциялар илк бор “Маҳорат дарси” доирасида бажарилди.
Шунингдек, 12 та беморда профессор Смирнов А.А. ва бир гуруҳ чет эл олимлари томонидан оғир юқори технологик эндоскопик операциялар мувоффақиятли бажарилди. Жумладан, “Қизилўнгач кардиал ахалазия I-II даражаси”, “Қизилўнгачнинг 1-2-даража ўсмаси”, “Ошқозон ўсмаси”, “Йўғон ичак ўсмаларида шиллиқ ва шиллиқ ости эндоскопик диссекцияси олиб борилди.
Ўрта Осиё ва Ўзбекистонда биринчилардан бўлиб, 14 ёшли Жиззах вилоятида яшовчи болада “Қизилўнгач 3-даражали кардиал ахалазиясида эндоскопик кардиал миотомия” амалиёти намунали тарзда амалга оширилди.
Тошкент вилоятида яшовчи 86 ёшли қарияда “Ошқозон пилорик қисми 2-даражали ўсмаси” эндоскопик каминвазив усулда олиб ташланди. Барча операциялар ўтказилган беморларнинг бугунги кунда аҳволи қониқарли бўлиб, меъёрий ҳаёт тарзи тикланмоқда.
Ушбу операциялар ўтказиши билан бир қаторда марказда ошқозон ичак тракти ва ўт пуфаги ҳамда ўт йўли тошлари билан касалланган беморлар семинарга ташриф буюрган чет эллик олимлар томонидан кўрилиши ва тегишли маслаҳатлар берилиши таъминланди.
