Республика шошилинч тиббий ёрдам илмий маркази Бухоро филиали бўлим мудирлари, врач ординаторлари томонидан ҳам тиббиёт илм фани йўлида кенг қамровли илмий изланишлар олиб борилаётганлиги қувонарли ҳолдир. Марказнинг кўплаб мутахассис врачлари тиббиёт соҳасининг турли мавзуларида илмий изланишлар билан шуғулланишмоқда. Бутунжаҳон ва мамлакатимиз миқёсида ўтказилаётган илмий конгресслар, конференцияларда ўз мақолалари, тезислари билан иштирок этмоқдалар. Ушбу иштирокчиларнинг кўпчилигини талабчан ва изланувчан ёшлар ташкил қилади. Марказда яратиб берилган қулай имконият ва шароитлар туфайли кейинги йилларда илмий ишлар билан шуғулланишга талаб ва қизиқиш кучайиб бормоқда. Раҳбарият томонидан изланувчи мутахассислар қўллаб-қувватланмоқда.
РШТЁИМ Бухоро филиалининг бир гуруҳ иқтидорли мутахассис врачлари илмий изланишлар самараси ўлароқ ютуқларга эришгаликларини алоҳида эътироф этиш жоиз.
Нейрохирургия бўлими врачи, тиббиёт фанлари номзоди Мурод Мўминов 2008 йилдан буён РШТЁИМ Бухоро филиалида ишлаб келмоқда. Профессор Г.М.Кариев раҳбарлигида 14.00.28-нейрохирургия ихтисослиги бўйича “Ўткир транзитор гидроцефалия билан оғриган беморларни даволашнинг клиник-диагностик жиҳатлари ва тактикаси” мавзусида докторлик (Dsc) диссертациясини 2024 йил 21 июн куни мувоффақиятли ҳимоя қилди.
Болалар реанимацияси бўлими бошлиғи Суннат Баратов профессор Ш.И.Наврўзова раҳбарлигида 14.00.36-аллергология ва иммунология ихтисослиги бўйича “COVID-19 билан инфицирланган оналардан туғилган чақалоқларда критик вазият истиқболида цитокиндиагностикаси” мавзусида 2024 йил 9 июлда фалсафа доктори (PhD) диссертацияси ҳимоясини мувоффақиятли амалга оширди.
Қабулхона бўлими врачи терапевт Нодирбек Ражабов, илмий раҳбар тиббиёт фанлари доктори Н.Ш.Ахмедова раҳбарлигида 14.00.05- “Сурункали буйрак касаллиги бўлган микроэлементар статус бузилиши эрта ташхисотининг клиник-лаборатор жиҳатлари ва уни коррекциялаш усуллари” мавзусида илмий изланиб, 2024 йил 5 май куни илмий ишини мувоффақиятли ҳимоя қилиш орқали фалсафа доктори (PhD) илмий даражасига эришди.
Қабулхона бўлими врачи, уролог Иззат Ҳамроев тиббиёт фанлари доктори, профессор Шухрат Тешаев раҳбарлигида 14.00.02-морфология ихтисослиги йўналишида мустақил илмий изланишлар олиб бориб, тиббиёт бўйича фалсафа доктори (PhD) диссертациясини 2024 йил 17 июл куни мувоффақиятли ҳимоя қилди.
Бугунги ўтказилган йиғилишда ёш олим ходимларнинг эришган илм-фан йўлидаги ютуқлари тўғрисида уларнинг меҳнатига муносиб баҳо берилиб, уларга илмий даража дипломи топширилди.
