Ромитан туманида Ўзбекистон Республикаси Мустақиллигининг 33 йиллик шодиёналари кенг нишонланиб келинмоқда. Ҳар куни маҳалла ва қишлоқларимизда байрам тантаналари. Ва бу байрамлар бизнинг озод ва обод ватанимизга, унинг халқига, келажак авлоди саналган фарзандларига, эл юрт тинчлиги ва осойишталиги йўлида муҳтарам Юртбошимиз раҳбарлигида олиб борилаётган бунёдкорлик ишларига камарбаста бўлган нуронийларимизга ҳам ярашади.
Қизилравот ҳудудида ўтказилган бугунги байрам тантанасида туман ҳокими Умеджон Барноев, туман Халқ қабулхонаси мудири Ғани Муясаров, Газли шаҳар ҳокими Умрулла Жумаев, туман ҳокими ўринбосарлари, соҳага алоқадор ташкилот ходимлари, фаол ёшлар, ўрта авлод вакиллари ва зиёлилар иштирок этди.
Тантана аввалида туман ҳокими Умеджон Барноев мустақиллик йилларида мамлакатимизда эришилган улкан натижалар, хусусан, туманимиз ижтимоий-иқтисодий, маданий ва маърифий ҳаётида рўй берган ўзгаришлар ҳақида сўз юритди. Қизилравотликларни мустақиллигимизнинг ўттиз уч йиллиги билан муборакбод этди.
Тантана файзли ва тўкин дастурхон атрофида, бир пиёла чой устида давом этди. Даврага миллий таом– ош тортилиб, йиғилганлар шарафига туман Маданият бўлимининг хушовоз хонандалари иштирокида концерт дастури тақдим қилинди, маданият ва санъат соҳаси вакиллари, хушовоз хонандалари ўзларининг энг сара қўшиқлари билан даврага шукуҳ бағишладилар.
Бундан ташқари Қизилравот ҳудудида байрам муносабати билан ташкиллаштирилган бу анъанавий ярмарка маҳаллада истиқомат қилувчи аҳолисига кўтаринки кайфият баҳш этиб, Республикамизнинг чекка ҳудудлари аҳолиси ҳам эътибордан четда қолмаганликларини яна бир бор ҳис этиб, вилоят ҳамда туман раҳбариятига миннатдорчилик билдиришди.
