Бухоро туманида бирламчи тиббий-санитария ёрдамини аҳолига яқинлаштириш ва тиббий хизматлар самарадорлигини ошириш, аҳоли ўртасида профилактика ишларини яхшилаш, касалликларни эрта аниқлаш ҳамда малакали тиббий хизмат кўрсатиш бўйича бир қатор ижобий ишлар амалга оширилмоқда.
Хусусан, бугун 30 август куни туман тиббиёт бирлашмасига қарашли «Кўчкўмар» маҳалла фуқаролар йиғинидаги Работ оилавий шифокорлик пункти қайта қурилиб, аҳолига фойдаланишга топширилди.
Тантанали тадбирда иштирок этган туман ҳокими Анваржон Очилов барчани замонавий оилавий шифокорлик пункти билан табриклаб, Давлатимиз раҳбарининг ташаббуслари билан мамлакатимизда соғлиқни сақлаш соҳасида амалга оширилаётган ислоҳотлар жараёнида аҳоли саломатлигини таъминлаш, тиббиёт сифатини оширишга катта эътибор қаратилаётганлиги, соҳадаги кўп йиллик муаммолар ҳал этилаётганлиги ҳақида таъкидлаб ўтди.
Мазкур пунктни ишга туширилиши натижасида, ҳудудда янги иш ўринлари яратилиб, 20 қатновли бўлган шифокорлик пункти қайта қурилишдан сўнг, бир вақтнинг ўзида 50 нафаргача тиббий хизмат кўрсатиш яхшиланди, шифокорлик пункти аҳоли саломатлигини мустаҳкамлашга қаратилган барча имкониятлар етарли.
Эндиликда барча қулайликларга эга бўлган, замонавий ушбу шифокорлик пункти фуқароларнинг оғирини енгил, узоғини яқин қилиш билан бир қаторда патронаж хизмати томонидан ҳудуддаги аҳолининг соғлигини доимий равишда назорат қилиб боради. Якунда маҳалла нуронийлари юрт тинчлиги, ободлиги ҳамда фаровонлигини сўраб дуога қўл очишди.
