Хотин-қизлар, вояга етмаганлар ва ёшлар ўртасида ҳуқуқбузарлик, жиноятчилик, эрта турмуш, эрта туғуруқлар ҳамда тазйиқ ва зўравонликни олдини олиш, аёллар бандлигини таъминлаш мақсадида “Муқаддассан, аёл” шиори остида тарғибот гуруҳи Ромитанда бўлди.
Туман секторларида ташкил этилган давра суҳбатларида “Оқила аёллар” ҳаракати, “Бувижонлар мактаби” аъзолари, фаол қизлар иштирок этдилар.
Давра суҳбатида сўзга чиққанлар Шарқона тарбияда қиз боланинг покизалиги, хушмуомалалиги, кийиниш одоби, уй ишларида, оилавий муносабатларда ҳалимликка алоҳида эътибор қаратилганига урғу бердилар. Шунингдек, ёшларни оилавий ҳаётга ҳар томонлама тайёрлаш, қизлар ўртасида соғлом турмуш тарзини тарғиб этиш, эрта никоҳ ва унинг салбий оқибатларини олдини олиш, оилада, айниқса оталарнинг қизларини кўз қорачиғидай асраши, уларга касб-ҳунар эгаллаш, илм олишда имкон бериши уларнинг жамиятда ўз ўрнини эгаллаб камол топишида ўз ҳиссасини қўшишида асосий роль ўйнаши таъкидланди.
Бундан ташқари, аёллар ўртасида жиноятчилик танқид қилинар экан, бу унинг асосий сабаби сифатида хотин-қизлар бандлиги, таълим олишидаги тўсқинликлар ҳақида сўз борди.
Шунингдек, йиғилганларга “Аёл қисмати” фильми намойиш этилди.
Тарғибот тадбирлари доирасида жойларда маданий дастурлар ҳам ташкил этилмоқда.
