Бугун Бухоро шаҳридаги Бухоро Муҳандислик технология институтининг фаоллар залида Ромитан туман ҳокими Умеджон Барноев иштирокида вилоят Олий таълим муассасининг Ромитанлик битирувчи ёшлари билан учрашди.
Учрашувда туман ҳокими ўринбосарлари, тегишли ташкилот, корхона раҳбарлари, туман камбағалликни қисқартириш ва бандликка кўмаклашиш бўлими масъуллари ҳамда тижорат банк вакиллари, 500 нафарга яқин мазкур ОТМ битирувчи талабалари иштирок этди.
Олий таълим муассасининг битирувчилари билан учрашув аввалида туман камбағалликни қисқартириш ва бандликка кўмаклашиш бўлими масъуллари томонидан бўш иш ўринлари “Меҳнат ярмаркаси” ташкил этилди. Бундан ташқари битирувчи ёшларга Ромитан туманида амалга оширилган ишлар ҳамда туманда ёшларга яратилаётган кенг имкониятлар тўғрисида видеоролик намойиши бўлиб ўтди.
Шундан сўнг, туман ҳокими Умеджон Барноев сўзга чиқиб, мамлакатимизда кейинги йилларда ёшларни қўллаб-қувватлаш, уларнинг ўз иқтидор ва салоҳиятларини юзага чиқаришлари учун кенг имкониятлар яратиб берилаётганлиги, Давлатимиз раҳбарининг ташаббуси билан олий ўқув юртлари моддий-техника базасини мустаҳкамлаш, илмий салоҳиятини юксалтириш, таълим сифатини халқаро андозалар даражасига кўтариш, иқтидорли ёшларни қўллаб-қувватлаш ва рағбатлантириш масалаларига алоҳида эътибор қаратилаётганлиги хусусида атрофлича фикр-мулоҳазалар билдирди.
Учрашувда Ромитанлик битирувчи талабаларни иш билан таъминлаш, бу борадаги мавжуд имкониятлар, жорий ўқув йилида вилоят ОТМларини тамомлаётган 500 нафарга яқин талабаларни мутахассислиги бўйича иш билан таъминлаш масалалари атрофлича муҳокама этилди.
Учрашув якунида Ромитан тумани ҳокимлиги ва вилоятимиздаги барча олийгоҳлар ўртасида ҳамкорлик меморандумлари ҳам имзоланди.
