Қоровулбозор туманида Хитойнинг “China Gezhouba Group Overseas Investment Co. LTD” компанияси томонидан қуёш фотоэлектр станцияси қурилмоқда. Қуввати 500 МВт бўлган қуёш фотоэлектр станцияси лойиҳасининг умумий қиймати 400 млн АҚШ долларини ташкил этади.
Яқинда лойиҳанинг дастлабки босқичи ишга тушди. Аниқроғи, 200 МВт электр энергияси ишлаб чиқарилиб, умумий тармоққа уланди.
Жорий йил май ойига қадар яна 100 МВт, сентябрь ойида эса лойиҳа тўла қувватда иш бошлайди.
Ҳозирда лойиҳа объектида 180 дан ортиқ махсус техника воситалари жумладан, юклагич, юк ташиш ҳамда юк кўтариш воситалари, экскаватор, автосамосвал, бурғулаш машиналари, шунингдек, 300 дан ортиқ хорижий ва маҳаллий ишчилар ишламоқда.
Хорижий компаниянинг бош пудратчиси томонидан ишчи-ходимларини ётоқхона билан таъминлаш мақсадида жиҳозланган 120 дан ортиқ ҳамда юк сақлашга мўлжалланган 160 дан ортиқ контейнер вагонлар олиб келинган.
Вилоят ҳокими Ботир Зарипов бугун мазкур объектда бўлди. Хорижий компания вакиллари билан билан мулоқот қилди. Уларнинг мавжуд муаммолари билан қизиқди. Шунингдек, лойиҳа амалга оширилаётган ҳудуддаги иш жараёнларини кўздан кечирди. Хорижий компания вакиллари билан лойиҳанинг истиқболи хусусида ҳам суҳбатлашди. Туман мутасаддиларига лойиҳа амалга оширилаётган ҳудудда инфратузилмани яхшилаш, айниқса, объектга олиб борувчи йўлни таъмирлаш юзасидан топшириқлар берди.
