Бухоро давлат университетида ҳар йили турли дастурлар, академик мобиллик келишувлари, халқаро лойиҳалар доирасида ҳамда университет маблағлари ҳисобидан 80 нафардан ортиқ хорижий профессор-ўқитувчиларнинг университет талабаларига маъруза ўқишлари, докторант ва магистрантларга илмий раҳбарлик қилишлари амалиёти йўлга қўйилган. Бунда асосий эътибор ушбу мобилликлар фақат дарс машғулотлари билан чекланмасдан, кафедралар ўртасида илмий ҳамкорликнинг йўлга қўйилишига ҳам қаратилади.
Шунингдек, университетда ҳар ойда бир маротаба хорижлик ўқитувчиларнинг ректор билан учрашувининг ташкил этилиши ҳам анъанага айланган. 14 март куни БухДУ ректори О.Хамидов айни пайтда университетда иш фаолиятини олиб бораётган, Буюк Британия, Италия, АҚШ, Ж.Корея, Миср, Эрон, Россия, Словения, Қозоғистон каби 10 та давлатнинг етакчи ҳамкор олий таълим муассасаларидан ташриф буюрган 16 нафар хорижлик ўқитувчилар билан учрашув ўтказди.
Учрашувда ҳар бир ўқитувчининг университетдаги фаолияти тўғрисида маълумот берилиши қаторида келгуси ҳамкорлик режалари тўғрисида ҳам фикр алмашилди.
