Бугун туман ҳокими Анваржон Очилов «Боғикалон» маҳалласида бўлиб, томорқа ерларидан самарали фойдаланаётган аҳоли хонадонлари ва иссиқхона фаолияти билан шуғулланувчи тадбиркорлар билан учрашди.
Маҳаллада томорқадан унумли фойдаланиб оиласи фаровонлигини таъминлаш билан бирга, эл дастурхони тўкинлигига муносиб ҳисса қўшаётган омилкорлар талайгина топилади. Улардан бири «Обиторат» қишлоғида яшовчи Сиддиқ Тошев 6 сотихли иссиқхонасидан олинадиган бу йилги даромаддан режалари катта.
- Томорқа даромад манбаи эканлигини ҳар бир хонадон соҳиби билиши керак, – дейди Сиддиқ ака Тошев. – Ҳозирда хонадонимиз умумий майдони 15 сотих бўлиб, шундан 6 сотихга иссиқхона ташкил қилдик. Бир йилда 3 мартадан ҳосил оляпмиз. Биринчи ҳосилимиз – кўкатлар етиштириб, бозорларга сотдик. Ҳозирда помидор ва бодринг парваришлаяпмиз. Апрель ва май ойларида етиштирган ҳосилимизни бозорга чиқаришни мақсад қилганмиз. Ундан сўнг кузда яна кўкат экамиз. Томорқамиздан бир йил давомида 40-50 миллион сўмгача соф даромад оляпмиз. Шу орқали фаровон турмуш кечириб келяпмиз. Меҳнат қилган одам кам бўлмаслиги амалда ўз тасдиғини топмоқда.
Шунингдек, туман раҳбари маҳалладаги ўрганишлари давомида масъулларга «Яшил макон» умуммиллий лойиҳаси давомида дарахт экиш, кўчалардаги дарахтларни оқлаш, йўл бўйларини тозалаб тартибга келтириш ишларини жадаллаштириш бўйича топшириқлар берди. Бунда аввало, маҳалла «еттилиги» фаоллик кўрсатиши зарурлигини таъкидланди.
