Унга Қуролли Кучлар сафида хизмат килиб, Ватан ҳимоясидек шарафли ишда сафдошларига ўрнак бўлаётган фидоий ходимлар, ҳарбийлар, уларнинг оила аъзолари ҳамда фахрийлар, ҳуқуқни муҳофаза қилувчи органлар, давлат ва жамоат ташкилотлари вакиллари таклиф этилди.
Соат 11.00. Саҳнага Ўзбекистон Республикаси давлат байроғи олиб чиқилди. Шундан сўнг Ўзбекистон Республикаси давлат мадҳияси янгради.
Тадбирда вилоят ҳокимининг ўринбосари Мирали Ҳамроев вилоят ҳокими, ҳарбий – маъмурий сектор раҳбари Ботир Зариповнинг байрам табригини ўқиб эшиттирди.
Эътироф этилганидек, бугунги байрам, нафақат ҳарбийларимиз, балки Ватанимизни жон-дилидан суйган ҳар бир фуқаронинг байрамидир. Шу боис ушбу сана муносабати билан вилоятимиздаги ҳарбий қисмларда, маҳаллаларда, таълим муассасалари, меҳнат жамоаларида ҳарбийлар, уларнинг оила аъзолари, фарзандлари, фахрийлар учун “Аскар оналарини улуғлаймиз”, “Менинг акам аскар йигит”, “Менинг ўғлим – Ватан ҳимоячиси”, “Менинг армиям – менинг фахрим”, “Халқ ва армия – бир тану бир жондир!” каби маънавий-маърифий учрашув ва кечалар ўтказилмоқда.
Албатта, бу каби тадбирлар ёшларда ҳарбий-ватанпарварлик фазилатларини шакллантириш, уларни миллий истиқлол руҳида тарбиялашда муҳим омил бўлмоқда. Ўз навбатида ёшлар ҳам бугун ўзларига катта ишонч билдирилаётганлигини амалда ҳис этиб турибди. Эндиликда ёшларимиз армия сафига хизмат қилишни ўзлари учун шарафли бурч деб билмоқда.
Сўнгги йилларда армия сафига ҳар бир чақирилувчи ўрнига 9-10 нафардан забардаст йигитларнинг талабгор сифатида чиқишаётганлиги армиямиз нуфузи ва ўрни ошиб бораётганлигининг амалий тасдиғидир. Мустақил юрт фарзандлари уларга билдирилган ишончни ҳар тарафлама оқлашга тайёрликларини намоён этиб, сиёсий ва ҳарбий синовларда кутилган натижаларга эришмоқдалар. Ўзбекистон Республикаси Мудофаа вазирлиги, Бирлашган штаб томонидан хизматда алоҳида ўрнак кўрсатган бухоролик йигитларнинг ота-оналарига ташаккурномалар юборилаётгани ҳам бунга яққол далил бўла олади.
Яна шуни алоҳида қайд этиш ўринлики, ўз ҳаётини миллий армиямиз билан боғлаш мақсадида мамлакат олий ҳарбий ўқув юртларига кираётган бухоролик ёшлар сони кўпайиб бормоқда.
Тадбирда ўзининг юксак азму шижоати, жисмоний ва маънавий салоҳиятини намоён этиб, Ўзбекистон Республикаси Қуролли Кучлари сафида давлатимиз мустақиллиги, ҳудудий яхлитлиги ва халқимизнинг осойишта ҳаётини ҳимоя қилишдек шарафли бурчни аъло даражада адо этиб келаётган, ўз хизмат мажбуриятларини бажаришда барча хизматдош дўстларига ўрнак бўлаётган ҳарбий хизматчиларнинг ота-оналарига вилоят ҳокимлигининг ташаккурномалари топширилди.
Байрам тадбирида ҳарбий хизматчилар томонидан жанговар санъат элементларини ўзида жамлаган ва Қуролли Кучлар қудратини намойиш этувчи, ватанпарварлик руҳи билан йўғрилган кўргазмали чиқишлар намойиш этилди.
Хушовоз хонандалар, таниқли санъаткорлар, ҳарбий оркестр, бадиий ва ҳаваскорлик жамоалари ижросидаги она Ватанни мадҳ этувчи куй ва қўшиқлар, мардлик ва жасурликни улуғловчи шеърлар барчага кўтаринки кайфият улашди.
Байрам тадбирининг иккинчи қисми “Рудизар” тўйхонасида бир пиёла чой устида давом этди.
Тадбирда Ўзбекистон Республикаси Қуролли Кучлари ташкил этилганининг 32 йиллиги ва Ватан ҳимоячилари куни муносабати билан Бухоро горнизони ҳарбий хизматчиларидан бир гуруҳига вилоят ҳокимлигининг ташаккурномалари ва совғалари топширилди.
Шунингдек, бир гуруҳ ҳарбийлар ва фахрийлар Мудофаа вазирлиги ҳузуридаги Жамоатчилик Кенгаши ҳудудий бўлинмаси аъзоси сифатида тақдирланишди. Қолаверса, тантанада ҳарбий қисмларга байрам муносабати билан китоблар жамланмаси туҳфа этилди.
Ватанни мадҳ этувчи ва дилларга байрамона кайфият улашувчи куй-қўшиқлар тадбирнинг янада кўтаринки ўтишини таъминлади.
