Бугун, 16 ноябрь эрта тонгда Бухоро спорт мажмуаси ўйингоҳида Бухоро шаҳрида 2023-2024 йилги куз-қиш мавсумини беталофат ўтказиш, тайёргарлик жараёнларини якунлаш бўйича тегишли соҳа вакилларидан иборат ишчи гуруҳларнинг эрталабки саф кўриги ўтказилди.
Саф кўригида иштирок этган вилоят ҳокими Ботир Зарипов Бухоро шаҳрида ижтимоий соҳа объектлари, иқтисодиёт тармоқлари ва кўп қаватли уйларда кўрилган куз-қиш мавсумига тайёргарлик ишларидаги аниқланган камчилик ва муаммоларни тез фурсатда бартараф этиш бўйича мутасаддиларга топшириқ ва кўрсатмалар берди.
Айниқса, қозонхоналарнинг техник ҳолати соз ҳолда бўлишини таъминлаш зарурлиги таъкидланди.
Шу билан бирга, кўп қаватли уйларга хизмат кўрсатувчи бошқарув сервис компаниялари фаолитини жадаллаштириш, табиий газ, электр энергияси, оқова тармоқларида аниқланган муаммоларни зудлик билан бартараф этиш юзасидан вазифалар ва муддат белгиланди.
— Ўтган йилги аномал совуқ шароитидаги аччиқ тажрибалар бугун ҳаммамизга сабоқ бўлиши керак. Ўтган йилдаги хатолар такрорланмаслиги бугунги ҳаракатларимизга боғлиқ, – деди вилоят раҳбари.
Шунингдек, вилоят раҳбари ноқонуний қурилмаларни бартараф этиш, жойларда ёнғин хавфсизлигини таъминлаш масаласига ҳам алоҳида тўхталди.
Саф кўригида кечаги куннинг вазифалари муҳокама этилиб, бугун амалга оширилиши лозим бўлган ишлар юзасидан чора-тадбирлар белгилаб олинди.
