Бугун Бухоро давлат педагогика институтида Хитойнинг Ханчжоу шаҳрида ўтказилган Осиё ўйинларида фахрли ўринни эгаллаган спортчилар Муҳаммад Рихсимов ва Шерзод Намозов иштирокида талабалар билан учрашув бўлиб ўтди. Учрашувни институт ректори Баҳодир Маъмуров очиб берди. Тадбир давомида спортчилар эришган ютуқлари, чемпионлик йўлидаги машаққатлари ҳақида талаба-ёшлар билан суҳбатлашди. Талаба-ёшлар ўзларини қизиқтирган саволларга атрофлича жавоблар олишди.
Шунингдек, тадбир давомида олий таълим муассасалари талабалари ўртасида ўтказилган “Беш ташаббус” олимпиадасининг республика босқичида Бухоро вилояти жамоаси шарафини енгил атлетика спорт тури бўйича ҳимоя қилган Бухоро давлат педагогика институти талабалари институт томонидан пул мукофотлари билан рағбатлантирилди. Маълумот ўрнида Бухоро давлат педагогика институти талабалари мазкур олимпиадада енгил атлетика спорт тури бўйича умумжамоа ҳисобида биринчиликни эгаллаб, рейтинг бўйича Бухоро вилояти жамоасига яна бир олтин медални тақдим этишган эди.
Учрашув сўнггида Хитойнинг Ханчжоу шаҳрида ўтказилган Осиё ўйинларида фахрли ўринни эгаллаган спортчилар Муҳаммад Рихсимов ва Шерзод Намозовга эсдалик совғалари топширилди.
