Ромитан туманида жойлашган “Жасурбек” тантаналар саройида Ўзбекистон Республикаси Ички ишлар органлари ташкил этилганлигининг 32 йиллиги ҳамда 25 октябрь – Ички ишлар органлари ходимлари куни муносабати билан туманнинг асосий байрам тадбири кенг нишонланди.
Байрам тадбирида туман ҳокими Умеджон Барноев, сектор раҳбарлари, ҳуқуқ-тартибот идоралари раҳбарлари, туман ички ишлар органлари ходимлари, соҳада узоқ йиллар самарали меҳнат қилиб бугунги кунда кексалик гаштини сураётган бир гуруҳ фахрийлар ва хизмат бурчини бажариш чоғида ҳалок бўлган фидойи ўғлонларнинг оила аъзолари, жамоатчилик вакиллари, корхона ва ташкилот раҳбарлари иштирок этди.
Байрам тадбирида иштирок этган туман ҳокими Умеджон Барноев тинч, осуда ҳаётимиз қўриқчилари, ҳуқуқ ва эркинликларимизнинг ишончли ҳимоячиларини касб байрамлари билан самимий табриклаб, халқимиз учун садоқат билан хизмат қилиш ҳар бир инсоннинг бурчи эканлигини, ҳар бир ходим аввало, ўз Ватанини, қолаверса касбини севган ҳолда хизмат қилса, қилинган меҳнат, албатта, ўз самарасини беришини таъкидлаб ўтди.
Ўз хизмат вазифаларига сидқидилдан ёндошиб, жиноятчиликка қарши курашиш ва унинг олдини олиш, жамоат тартибини сақлаш билан бир қаторда туман ҳудудида олиб борилаётган тадбирларда фаол иштирок этиб келаётган фидойи ходимлар хизмати алоҳида эътироф этилиб, сана муносабати билан туман ҳокимлигининг қимматбаҳо совғалари топширилди.
Тўкин дастурхон атрофида давом этган байрам тадбирида туман Маданият бўлими ходимлари томонидан қизиқарли концерт дастури намойиши ҳамда элимиз суйган санъаткорларнинг чиқишлари ва ижро этган куй-қўшиқлари тадбир иштирокчиларига кўтаринки кайфият улашди.
