Вобкент тумани 1-сектор ҳудудида жойлашган “Мирвоши” маҳалласида бугун туман ҳокими Ф.Умаровнинг аҳоли билан учрашуви бўлиб ўтди.
Учрашувда Вобкент туман Халқ қабулхонаси мудири Л.Шарипова, ҳоким ўринбосарлари, тумандаги бир қатор корхона, ташкилот ва муассасалар раҳбарлари ҳам қатнашди.
Учрашув аввалида туман ҳокими Ф.Умаров мамлакатимизнинг сиёсий, ижтимоий ва иқтисодий ҳаётида кечаётган кўламли ислоҳотлар, аҳолининг турмуш даражасини юксалтириш, мавжуд камчилик ва муаммоларни бартараф этиш, хусусан туман секторларида қилинаётган ишлар ҳақида тўхталиб ўтди.
Шундан сўнг фуқароларнинг ариза ва шикоятлари тингланди. Жумладан, электр энергияси бўйича муаммолар, тадбиркорлик қилиш учун ер жойи олиб бериш, пиёдалар йўлакчаси қуриш, ичимлик суви миқдорини кўпайтириш каби масалалар кўтарилди.
Бу муаммоларни бартараф этиш юзасидан масъул корхона, ташкилот, муассасалар раҳбарларига тегишли топшириқлар берилди.
