Айни кунларда юртимиз бўйлаб пахта йиғим-терим мавсуми авж паллада давом этмоқда. Машаққат билан етиштирилган ҳосилни нес-нобуд қилмай йиғиб олиш мақсадида теримчилар, кўнгилли ҳашарчилар астойдил бел боғлаб меҳнат қилишмоқда.
Бугун Ромитан тумани ҳокими Умеджон Барноев, Халқ депутатлари туман Кенгаши котибияти мудири Раҳима Атоева, туман ҳокимининг қишлоқ ва сув хўжалиги масалалари бўйича ўринбосари Аброр Рахматов, туман қишлоқ хўжалиги бўлими бошлиғи Бобир Солиевлар Ифтихор маҳалла фуқаролар йиғинида жойлашган “Ёмғир” фурмер хўжалиги, Хўжауббон маҳалла фуқаролар йиғинида жойлашган “Диёрбек Дилдора Феруза” ҳамда “Имом бобо” фермер хўжаликларига қарашли дала майдонларидаги терим жараёнида иштирок этаётган теримчилар билан суҳбат ўтказиб, яратилган шароитлар ва қулайликлар билан танишди.
Пахта йиғим-теримига иштирок этаётган теримчилар учун иссиқ овқат, тоза ичимлик суви, пахтани ўлчаш учун эса барча шароитлар яратилган. Ҳафта якуни билан илғор теримчилар аниқланиб рағбатлантириб борилаётгани билан бир қаторда пахта терим пулларини ўз вақтида етказиб берилаётгани учун ҳашарчилар ўзларининг мамнунликларини билдиришди.
Туман раҳбари теримчиларга қуёшли кунлардан унумли фойдаланиб, деҳқонларимиз етиштирган ҳосилни совуқли кунларга қолдирмасдан нес-нобуд қилмай йиғиб-териб олишга чақирди.
Шундан сўнг, фаол теримчилар туман ҳокими томонидан эсдалик совғалари билан тақдирланди.
