Азиз укаларим, сингилларим!
Сўзим аввалида, Сизга Бухоро давлат университети таълим йўналишларини танлаганлигингиз учун чексиз миннатдорлик билдираман.
Бугун Сиз ҳар бир ота-она “Фарзандим олийгоҳга кириб, зиёли бўлсин!”, деб орзиқиб кутган ҳаётингиздаги яна бир шарафли синов остонасидасиз. Шу кунларда, Сизнинг қалбингиздаги умид, ҳаёжон, истакларни биз, олийгоҳ маъмурияти чин юракдан ҳис этиб турибмиз.
Сўнги етти йилда Президентимизнинг шахсий ташаббус ва иродалари билан барча соҳалар сингари таълимга ва айниқса, абитуриентларнинг ўзи истаган олийгоҳни танлаш ва унга ўқишга кириши учун адолатли, шаффофликка асосланган кенг имтиёз ва қулайликлар яратилди. Буни ҳар бир жамиятимиз аъзоси қаторида, Сиз ва Сизнинг яқинларингиз кўряпти, гувоҳ бўляпти.
Ҳақиқатан ҳам, ҳар бир ўқишга кираман деган ёш билимларни эгалласа, албатта ўқишга киряпти. Ва ишонинг, Сиз ҳам билимларни эгаллаган бўлсангиз, албатта ўқишга кирасиз!
Бежиз мамлакатимиз раҳбари “Янги Ўзбекистон бунёдкори бўламан!”, “Учинчи Ренессанс пойдеворини яратишга муносиб ҳисса қўшаман!”, деган юксак мақсадлар фарзандларимиз қалбидан чуқур жой олиб, уларнинг ҳаёти ва фаолияти мазмунига айланиб бораётгани билан ҳар қанча фахрлансак, арзийди”, дея ишонч билдирмадилар. Сиз ана шундай ишончни оқлайдиган қолаверса, ота-онангиз, яқинларингиз, таълим берган устозларингизни орзу- ниятларини рўёбга чиқарувчи инсонсиз.
Имтиҳон жараёнларида Сизга Яратгандан омад ва муваффақият тилаб, Бухоро давлат университети талабаси мақомига эга бўлишингизни тилаб қоламиз.
Самимият билан,
Обиджон ҲАМИДОВ,
Бухоро давлат университети ректори,
профессор
